Esaki sigur a causa cu dos gobernante mester a wordo lanta, esnan di mando policial y tambe comandante di kazerne.
Ta asina cu radar a capta cinco embarcacion di guerra pasando pariba di Aruba direccion di Venezuela. Ora cu a mira e movecion aki no a duda pa actua. Pesey mes riba nivel di gobierno a cuminsa haci e prome contactonan.
E barconan militar di Venezuela no tabata para pero tabata den movecion constante pasando. Den contacto cu minister di husticia el a confirma cu nan tabata den reunion te marduga. Prome minister Mike Eman tambe tabata presente na Mariniers Kazerne durante reunion. Aki e contactonan a wordo haci tanto cu Hulanda y tambe cu Merca riba e situacion y nan tabata pendiente. A tuma contacto cu Venezuela pa mira kiko ta e problema cu nan tin barconan militar pasando den e area. E timing tabata e motibo cu mester a bai den alerta.
E expresion di presidente di Venezuela algun dia pasa y e situacion cu Hugo Carvajal sera na KIA a pone cu mester a mobiliza tur hende na Aruba, Hulanda y Merca ora a señala e barconan pasando. Segun Venezuela nan tabata biniendo di un otro mision y tabata bayendo nan base pasando riba e ruta aki. E no tabata tin ningun intencion malo su tras. Asina e situacion cu na prome instante tabata mustra menazante a calma totalmente.
Autoridad na Aruba ta keda den alerta tog mirando e presencia di Hugo Carvajal cera na KIA cu vigilancia constant. E no tin ningun tipo di contacto cu ningun hende y esey nifica cu e temor pa logra yega den contacto cu hendenan pafor di KIA no mester existi.
Biniendo bek riba e barconan tabata algo pasa di 4or cu nan a pasa bai y pa 5or e reunionnan a cuminsa te cu casi 7or di mainta. Miembronan di seguridad di Aruba y tambe Prome Minister a haya un splicacion completo riba ruta cu e barconan tabata pasando tuma for di e radar.
Mientras tanto, Hugo Carvajal a bandona Aruba den oranan di anochi.
| FUENTE: http://www.diario.aw |
