E proyecto riba su mes ta canando dos trayecto den forma simultaneo, pues di un banda nan debe un cantidad di compania y doñonan di propiedad riba e proyecto, mientras cu di otro banda ta haciendo un intento serio di bende henter e propiedad cu un grupo nobo, den cual ta figura entre otro e conocido comerciante local Maarten van Romondt.
Den e caso di e bancarota, desde aña 2013 caba Corte a duna e compania un tempo di gracia pa por a sali for di su retonan financiero. E temporada a transcuri y no tabata suficiente pa por a cumpli cu e mas di 100 miyon florin cu tin na debe.
Un grupo chikito di esunnan riba e lista cu Tiera del Sol debe no kier tende nada mas, nan ta boga pa declara e compania den bancarota y pa nan haya nan parti loke ta coresponde na nan. Si e parti ey ta nifica perde tur cos, nan no ta interesa, pasobra te cu awor nan no ta hayando nada toch. Pero e grupo ey no a logra convence tur e otronan pa pensa mesun cos y como tal a keda den un minoria.
Di otro banda, e grupo di doñonan, cu ta dos grupo Hulandes, ta buscando tur forma pa bende e compania. Pero como cu e compania tin asina tanto debe, lo bira imposibel pa logra haya un balor positivo cu lo por traduci su mes cu e doñonan ta logra paga e creditornan, logra recobra nan inversion haci y eventualmente saca un ganashi chikito.
Pa por logra e meta ey, aunke e ta uno hopi optimista, lo mester hisa e balor di e propiedad, mas di locual e ta awor aki caba. Un di e formulanan cu a pensa, ta pa convence Gobierno pa otorga nan un permiso pa construi un hotel y eventualmente casino tambe, riba e tereno disponibel di Tiera del Sol. Esey mesora lo hisa e balor di e propiedad y asina lo por haci cu e doñonan nobo mester injecta un suma mas halto pa compra di e propiedad.
Te cu awor, Gobierno no a bay di acuerdo cu e proposicion riba mesa, basa riba e hecho cu tin un monopolio riba mas camber di hotel y sin lubida e historia di e proyecto ey mes tambe cu de facto, nunca tabata color di rosa. Un permiso pa hotel sin duda lo traduci su mes den importacion di mas empleado stranhero y cu e pregunta si Aruba por carga mas camber di hotel y tur e otro consecuencianan socio-economico cu e ta trece cune.
Asina mes nos ta compronde cu tin bastante preshon riba Gobierno di ambos banda, tanto di e grupo cu kier bende/cumpra e propiedad cu ta bogando pa duna e permiso pa hotel, como tambe e otro grupo cu ta insisti cu no por soluciona un problema di mal maneho financiero di un grupo Hulandes, dor di hinca henter e pais aki den un stress socio-economico dor di permiti mas hotel y mas casino na Aruba.
Pero cu e decision di Corte ayera, e doñonan actual ta haya un poco mas rosea pa por sigui cu e proyecto, paga un suma chikito na e creditornan mientras ta sigui explora mas opcion pa mira con ta saca e compania for di su debenan, sea ta cu un hotel eyriba of dor di cualkier otro formula creativo cu nan lo ta evaluando awor aki.
| FUENTE: http://24ora.com |
