Pa tur hende compronde bon, Polis no ta para riba ley. Riba Polis tin Ministerio Publico y riba nan ainda tin nos sistema di Corte cu constantemente ta vigila si Polisnan y Fiscalnan ta actua corecto y cu no ta abusa di nan poder. E sistema hudicial riba nos isla ta funciona di tal forma cu esun ta controla e otro, pa evita abuso y garantisa transparencia.
Den e caso specifico aki, cu a tuma luga na luna di September di aña 2013, un pareha turista a yega cu paña tur muha, burachi, na balie di Avianca pa por aborda e vuelo pa Bogota, Colombia. E aerolinea a opta pa nenga di laga nan subi e vuelo, pa cual nan a lanta cu e personal di e aerolinea y a destrui e computer. Mesora a yama siguridad cu na nan turno a pidi presencia di Polis.
Asina Polisnan di Aeropuerto a yega eynan, detene e pareha y hiba nan pa nan oficina. Eyden e homber a bisa e agente di Polis cu e lo gaña tur hende cu el a horta su placa for di dje. Na momento cu e Sub Fiscal a yega Aeropuerto, e homber a lanta cune y menas’e, purbando pa bringa cu e Inspector di Polis cu na e momento ey mester a dicidi cu si ta encarcela e sospechosonan of no. Durante cu e Sub Fiscal tabata na telefon cu e Fiscal di Ministerio Publico, e sospechoso a grita duro cu e lo rementa nos aeropuerto y peg’e na candela.
Claro cu e acusacion e ora a bira mucho mas serio cu djis un pasahero burachi cu a destrui propiedad di un aerolinea. Den casonan asina ta papia di menaza di terorismo, cu den leynan di aviacion ta pisa masha. Esaki a pone cu Fiscal a duna ordo pa encarcela ambos sospechoso.
Despues di dos dia di prison, Fiscal a opta pa prolonga nan detencion cu 8 dia mas y Hues Comisario a ratifica e detencion tambe. Cu esey ta haci masha dificil awor pa acusa Polisnan di a cera ningun hende den forma inhusto. Ta bon pa tur hende compronde cu Polis no tin e poder pa cera ningun hende, cu esey ta e autoridad di Ministerio Publico.
Despues di 10 dia, e sospechosonan a bay di acuerdo cu un proposicion di Fiscal pa paga un multa y bandona nos isla. Esey ta evita cu nan mester regresa pa un otro caso penal dilanti Corte. Nan a bay di acuerdo, a paga e multa y nunca a bisa nada relaciona cu maltrato of cu a horta nan pertenencianan manera awor ta purba pretende riba internet.
Finalmente, Cuerpo Policial Aruba ta lamenta cu a opta pa tuma un articulo asina for di internet, sin ningun momento verifica cu Polis si ta berdad of tuma e banda di e organizacion policial prome cu publica algo asina, mancha nomber di e Polisnan envolvi y crea un impresion robes di Cuerpo di Polis.
Tur ciudadano ta liber pa entrega un keho oficial na e instancianan concerni, manera ta LandsRecherche, den caso nan sinti cu Polis no a trata nan debidamente. Ta lamentable si cu ta duna credibilidad na storia di un pareha burachi cu a causa destruccion y a bira un menaza pa aviacion civil, sin tende e banda di medaya di e organizacion cu diariamente ta percura pa nos siguridad y orden publico.
E Polisnan envolvi ta evaluando pa entrega un keho di difamacion contra tur envolvi.
| FUENTE: http://www.diario.aw |
