(Aruba) A recorda 51 aña cu tankero Esso Maraciabo biniendo Aruba a deriba e Puente Urdaneta

Na Maracaibo a wordo recorda e fecha cu un tankero yama Esso Maracaibo, cu a sali for di La Salina, na Cabimas, y cu tabata tin como destino Aruba, debi na un faya electrico a dal contra e Puente Rafael Urdaneta, ubica riba e Lago di Maracaibo, y cu na e momentonan ey tabata recien inaugura.

Esaki a sosode pa ser exacto riba un 6 di April, ora cu varios automobilista tabata core riba e ponton menciona y a mira con varios otro auto cu tabata core nan dilanti, diripiente a disparce.

E ponton, conoci como “El Coloso”, debi na su estructura imponente, a wordo impacta pa otro titan: e tankero Esso Maracaibo, di Creole Petrolium Corporation, cual tabata transporta abordo 262 mil bari di crudo. E tankero a bay dal contra e pilarnan 31 y 32 di e arteria vial y a deriba completamente 259 mil meter di e construccion di concreto y a ocasiona cu siete auto a cay na awa y e siete chofernan a fayece.

A pasa caba 51 año for di e momento cu Esso Maracaibo a dal contra e ponton menciona, mientras e tabata realiza un maniobra pa cruza e canal di navegacion di e Lago di Maracaibo, cu destino pa Aruba.

A bin resulta cu un faya electroco serio a pone e capital Avelino Gonzalez Zulaica, cu tabata tin varios aña den servicio di Creole, a perde control. E capitan no a logra evita e tragedia. E buke Esso Maracibo tabata tin binti aña na Venezuela y el a wordo treci for di Merca y poni na servicio di Creole Co.

FUENTE: http://www.diario.aw