Despues di esaki sr. Infantino a bisa cu nan a papia di futbol, con sigui desaroya futbol na Aruba y hiba futbol den henter comunidad.
“Mi ta testigo di e pasion di boso Prome Minister pa loke ta futbol y loke ta tambe un refleho di e pasion di henter e pais. Esaki ta tremendo pasobra pasion ta e base di loke nos mester ora nos di FIFA kier desaroya futbol, cu ta nos mision primordial. Tin algun proyecto di futbol masha prometedor aki na Aruba, entre nan e veldnan chikito di futbol den barionan. Tambe beach futbol ta un otro proyecto y asina tin hopi mas cu nos por traha hunto riba nan y coopera pa asina trece alegria pa henter e poblacion. ‘Because futbol is the most magical sport in the world’.”
Infantino a splica cu mas di un aña pasa e tabata na Aruba ora e tabata campañando pa presidencia di FIFA. “Mi a topa cu President di AVB, mi amigo Richard Dijkhoff, kende ta haciendo un trabao fantastico. Mi ta masha contento di por ta back aki na ocasion di e congreso di CONCACAF. Tambe pa topa Richard y papia cu Prome Minister Eman y brinda sosten na nan den desaroyo di futbol aki na Aruba.
E trabao haci door di AVB ta algo fantastico, hopi structura y hopi profesional den un ambiente cu no semper ta facil door di varios retonan. Pero AVB a supera nan tur pa cual mi por bisa di ta orguyoso di ta un amigo di AVB y Richard. E y henter e comunidad futbolistico por conta riba mi mescos ami por conta riba nan y hunto nos por haci cosnan grandi.”
Presidente di FIFA a regala Prome Minister Eman un T-shirt di FIFA cu nr. 9 riba dje y un banderin di FIFA. Prome Minister a regala ambos Presidente un replica di un cas estilo Arubiano y a splica nan con e casnan aki antes tabata worde construi, sin tecnologia moderno, pero uzando logica logrando e miho beneficionan cu naturalesa tabata ofrece nan.
FUENTE: https://www.diario.aw
