Informacion for di St. Lucia, ta indica cu e barco crusero Freewinds, ta den cuarentena awor cu e ta mara den waf. Esaki debi cu por lo menos 1 miembro di tripulacion ta infecta cu e virus di sarampi. E barco a yega na Waf di Castries, St. Lucia.E brote di sarampi aki ta loke a forza e crusero pa keda den cuarentena, y e pasaheronan no por baha. Oficialnan di e isla mes no kier a revela cua crusero esaki ta, sinembargo prensa Mericano a identifica esaki como “Freewinds”.
E barco Freewinds ta pertenece na Church of Scientology, y hopi biaha e sa usa Aruba como un homeport. Sinembargo e ultimo biaha cu e tabatey na Aruba ta den e weekend di Diasabra 27 di April.
DIARIO a confirma mientras tanto cu Freewinds no tin ningun fecha reserva pa bishita Aruba den luna di Mei.
St. Lucia a prohibi esnan abordo di e barco di baha na nan isla, ora cu autoridadnan medico a haya informe cu tin pasaheronan cu e malesa di Sarampi abordo.
Autoridad di e isla a haya sa di e caso aki, ora cu un pasahero a bay keha cu tin hopi hende cu sarampi abordo di Freewinds. Ta e ora ey numa, e Funcionario di mas halto di medicina na St. Lucia, esta Dr. Merlene Fredericks-James a haya sa di dje.
Asina nan a tuma accion contra esaki, y pa evita cu sarampi lo por plama na e isla, a djis prohibi tur pasahero di baha. Sarampi ta un malesa asina contagioso, cu si un persona tine, como 90% cu ta hopi cerca di e persona aki cu no a yega di haya vacuna, lo bay wordo infecta. Hendenan infecta cu sarampi, lo por sigui plama e malesa pa otronan, como 4 dia prome cu bo haya e prome manchanan riba bo cuero.
Prensa Mericano mesora a plama e noticia aki. E barco Freewinds ta uno chikito, cu por carga solamente 300 pasahero.
(E version aki ta coregi un nota incorecto anterior, esta cu e barco a bandona Aruba dia 27 di April 2019, y no 14 di April 2019).
FUENTE: Diario de Aruba
