Prome mandatario a reitera cu e situacion na Venezuela ta sigui hopi tenso, y lo bin mas sancion riba e pais cu lo crea mas presion ainda riba e pais.Gobierno a tuma nota, e siman aki, di expresionnan haci door di un miembro di Parlamento di Venezuela, sr. Carreño cu prome minister ta haya hopi serio.
Na prome lugar e parlamentario Venezolano a bisa cu nan ta bay salba Aruba di e gara colonial di Hulanda, y cu nan ta bin pone bandera di Venezuela aki pa libera nos pais di e colonia Hulandes.
Na di dos, e parlamentario a bisa cu Hulanda ta uza e teritorionan di Aruba y Corsow pa ehercicionan militar Mericano.
E parlamentario a expresa cu nan tin nan misilnan dirigi riba tur avion cu lanta di Aruba cu direccion pa Merca.
Prome Minister a subraya cu esaki ta expresionnan sumamente serio cu gobierno di Aruba no ta acepta di ningun persona, y sigur no si ta un parlamentario di e pais bisiña.
E dignatario a duna di conoce cu mesora gobierno a tuma accion pasobra e tin cu mustra e seriedad di esaki.
Premier Wever-Croes a bisa cu tur hende ta bon bini pa pone nan bandera unda cu nan kier, pasobra aki na Aruba nos ta pone bandera na nos cas tambe, pero nos tin un pais autonomo cu tin 33 aña di Status Aparte, y no meter di ningun pais pa bin libera nos di nada.
“Na momento cu bo ta menaza cu bo ta bay ataca avionnan cu ta lanta for di Aruba, esaki ta un menaza hopi serio cu nos ta pone na nivelnan di mas halto” Minister Presidente a expresa.
E dignatario a subraya tambe cu aki na Aruba no tin ningun ehercicio militar Mericano a sali, e no ta permisible ni tin ningun acuerdo riba esaki.
“Es mas, e acuerdo ta cu no ta uza nos pais pa nada militar den e conflicto entre Merca y Venezuela” Prome Minister a enfatiza.
E mandatario a informa tambe cu mesora gobierno a tuma contacto cu e Minister di Relacionnan Exterior di Hulanda, mirando cu esaki ta algo cu mester wordo atendi na nivel di Reino. Y tambe a manda un nota diplomatico pa gobierno Venezolano den cual e ta expresa su disgusto riba e expresionnan di sr. Carreño den cual a exigi aclaracion di e gobierno di Venezuela.
E mandatario a informa cu mesora e representante di Venezuela na Den Haag a wordo ontboden (convoca), loke kiermen cu e tin cu duna cuenta inmediatamente, y el a menciona cu nan ta distancia di e expresionnan aki di sr. Carreño.
Gobierno ta exigi cu for di e nivelnan mas halto, sr. Arreaza mes, cu ta e minister encarga cu Relacionnan Exterior distancia su mes di e expresionnan aki.
“Nos kier pone bon cla cu e situacion na Venezuela ta crea un impacto negativo hopi grandi riba nos pais. Nos tin un responsabilidad cu nos comunidad, nos pueblo nos pais na prome lugar”, Minister Presidente mr. Evelyn Wever-Croes a subraya.
El a agrega cu e tipo di expresionnan asina gobierno no ta acepta di ningun manera, y ta purba di trata, bao di e circumstancianan cu tin, na e mihor manera posible, sinembargo nan tambe mester tene cuenta di nan banda, cu loke ta wordo haci y ta wordo bisa.
“Mientras tanto nos a cera frontera pa tres luna mas, y nos ta mira aworaki aki, pakico nos mester a cera e frontera. Mi ta kere cu poco, poco esnan cu tin duda ainda si e frontera mester ta cera, tambe ta convenci cu esaki ta mihor cos pa haci”, Minister Presidente a remarca.
FUENTE: Con información de Diario de Aruba
