sábado, 19 de octubre de 2019

Diario de Aruba: E debe nacional y fantasia di Citgo ta rementa Statuut y Constitucion


Reino ta consciente di e abuso cu gobierno anterior a comete
Reino henter y no Hulanda so ta forma supervision di gobernacion
Tin un motibo cu Reino a duna Gabinete Wever-Croes oportunidad pa busca un salida pa e situacion di Aruba.  Reino, cu ta forma dor di tur pais Hulandes, ta consciente di loke a pasa cu Aruba.
E Conseho di Ministro di Reino, Rijksministerraad, ta conoci cu loke a pasa cu Aruba y di e abuso cu gobierno anterior a haci cu Aruba.

E debe nacional y e fantasia di e proyecto Citgo ta rementa Statuut y Constitucion di Reino mescos cu e leynan basico di Aruba.

E cuadro di ley di nos pais ta basa directamente riba e bienestar di ciudadanonan. Ley no ta basa riba tram ni brug na Balashi. Ley no ta basa riba placa den caha di partido ni posicion di ningun ciudadano cu kier eleva su mes como gobernante pa medio di politica.

Nos cuadro di ley ta exigi pa e ciudadano, y na Aruba pues e Arubiano, por gosa di condicionnan cu ta percura pa su felicidad.

Si Reino Hulandes ta duna aanwijzing y ta tene supervision, ta pasobra mester percura pa e calidad di bida di e Arubiano. Hulanda ta bon na haltura di loke a pasa cu Aruba, manera e cantidad di preguntanan serio cu a wordo lansa den seno di Parlamento Hulandes sigur di 2009 pa 2017 ta demostra.

Hulandesnan a hari Prome Ministro Mike Eman y su welga di hamber cu mester a kita bista for di e realidad financiero di Aruba cu el a cuminsa crea for di momento cu el a sinta.

Den e introduccion di Citgo, Ministro di Relacionnan den Reino, mester a splica Tweede Kamer cu Hulanda no tin ningun participacion den e riesgonan cu gabinete Mike Eman tabata introduci na Aruba.

E colegio di supervision di Reino, cu mester tin e garantia cu e ciudadano di Aruba no ta bay failliet of bira parti di un comunidad di miseria, tin tur cifra di Aruba y tambe prueba con gabinete Mike Eman a comete pica mortal contra e alma  y esencial di Statuut y leynan basico di Reino y Aruba.

Ora tuma nota di loke e areglo pa relacionnan den Reino y e cuadro di ley ta bisa, ta yega na e conclusion cu gobierno Mike Eman a rementa nos sistema y a hiba Aruba conscientemente pa estado di bancarota.

DIARIO no ta hunga politica pero ta dispuesto pa entrega tur prueba di loke a pasa cu Aruba manera ta hancra den rapportnan oficial cu tambe a mustra dede riba e miembronan di Parlamento di AVP.

Rapportnan oficial cu ta guia di Reino Hulandes, di IMF y tur instancia cu ta atende cu e situacion financiero y economico di Aruba, ta mustra dede riba e abuso di gobierno Mike Eman.

Esaki ta e motibo cu tur instancia a duna e gobierno nobo di Evelyn Wever-Croes oportunidad pa busca solucion pa evita cu Aruba ta zink.

Hamas Aruba a conoce un gobierno di mala fe manera a pasa durante 2009 pa 2017 y Reino ta bon na haltura.

Awor palabra ta keda na investigacionnan di rapportnan dor di Husticia di Aruba, cu mester determina si gobierno Mike Eman ta paga of no ta paga pa e crimen cu el a comete contra Aruba manera rapportnan ta demostra.

FUENTE: Diario de Aruba
 

LO + Leído...