Manera ta conoci un grupo di 5 chauffeur di e ruta aki a tuma e decision di bay corte pasobra nan no tabata di acuerdo cu e ruta nobo cu a keda palabra cu Minister di Transporte y DOPV, nan kier a keda cu e ruta cu nan tabatin anteriormente. Decision di huez tabata na nan fabor y asina, cumpliendo cu e decision aki, nan a keda cu nan ruta bieu cu no ta permiti nan pa core e ruta di hotelnan, algo cu nan no a gusta tampoco.
Mirando e situacion aki, e otro chauffeurnan a dicidi di bay serca Minister Oduber pa bise cu nan si ta contento cu e ruta nobo y cu nan ta para 100% su tras.
Charles Thomas, un di e chauffeurnan, a bisa cu e ta forma parti di e grupo cu a firma pa e maneho nobo, cu nan ta contento cu e maneho y pa tal motibo nan a reuni diabierna cu e minister.
El a duna di conoce cu anteriormente nan por a core e ruta di hotel, pero awor nan tin e oficializa, nan tin un decreto ministerial riba nan vergunning cu ta bisa cu nan por haci esaki, lo cual ta bon pa nan, pasobra si antes algo lo a pasa riba e ruta sin cu nan tabatin permiso oficial pa core, e ora nan lo por tabatin problema cu entre otro seguro.
“Ami ta di acuerdo cu su maneho, e ta un tremendo maneho, mi no ta mira ningun desventaha den e maneho, pasobra awor oficialmente nos por core na hotel”.
Otro chauffeur di autobus di e ruta di Noord, Ronnie Jansen, a duna di conoce cu nan ta core e ruta di Kentucky bay Noord y si nan no haci’e e ora piratanan ta haci’e, cual na e momentonan aki ta un problema grandi.
E ruta di hotel tambe a bin aserca, pero anteriormente nan no por a core e ruta di Westin pa Alhambra. Es decir, si nan tabatin un pasahero cu lo a bay un di e hotelnan den e ruta ey, nan no por a hibe, of mester a pasa den mondi pa hibe y awor si nan por y tur cos ta bayendo bon.
El a agrega cu e si no lo kier e ruta bieu cu e otro 5 chauffeurnan a haya, pasobra si nan tur bay biba di e ruta ey, nan no lo por pasobra no tin suficiente hende. “Danki Dios nos tin e hotel, pasobra si nos no tin e hotel, nos por wel di stop”.
Ety Jansen, chauffuer tambe, di su banda a mustra cu e ta contento cu e ruta, pero cu ainda tin algun cos mas cu mester wordo haci, manera tapa e buraco cu tin ainda na e busstation di Arubus pa asina nan por drenta y duna un mihor servicio. Tambe e ta pidi pa elimina e chauffeurnan pirata, incluyendo riba ruta di Noord. E ta spera cu minister por haci algo pa elimina e situacion aki.
FUENTE: http://www.diario.aw/2011/08/chauffeurnan-di-autobus-di-ruta-di-noord-para-100-tras-di-maneho-di-minister-otmar-oduber/
