(Aruba) Criticanan di MEP ta parti di e hipocresia mas grandi na mundo!

ORANJESTAD(AAN) Ata un partido cu a degenera di tal forma cu no a keda ni sikiera cu shinishinan di cualke prestigio cu na un tempo e por tabata tin. E nepotismo di Nel cu tur e rumannan y primonan y famianan cu el a prop den Gobierno no ta suficiente pa pone un candal riba su boca? Ta con un elemento cu a comete tanto abuso y desgracia cu e placa di Pueblo por sikiera habri su boca? Ta pesey nan ta bisa cu el a core bay sconde na cas na lugar di ocupa su puesto den Parlamento, pa e no haya e tsunaminan cu su gobierno di puro probecho personal, enrikecimento personal y corupcion a provoca.
Awor ta critica contra un tremendo proyecto di e Ministro di Enseñanza, un proyecto limpi, transparente, di un necesidad urgente pa enseñanza, investiga te den su ultimo detayenan pa e expertonan di Gobierno cu a bay te Merca pa reuni cu e ingenieronan y constructornan di e structuranan, poniendo un banda e desastrenan cometi cu e propiedadnan y placa di Pueblo.
Unda tur e “regalonan” na sponsernan di MEP a keda? Tur e miho terenonan cu a ser otorga como fabor politico y pago pa financiamento durante Campaña? Unda e 15 miyon y mas di e fracasado proyecto di dump a keda? Ta con estupido bo por ta pa critica un proyecto limpi y bon poni den otro, mientras den bo cashi bo tin warda un cantidad enorme di desastrenan cu no por mira luz di dia sin cu nan lanta un rabia inmenso den Pueblo contra e partido cu a comete nan?
MEP no ta gusta e desaroyadornan di e proyecto? So what? Ta e proyecto riba su mes tin e merito no esnan su tras. Y si tabata tin un Procurador General imparcial den e puesto, ta na rij e Mepistanan di e Gobierno di MEP lo a bay para dilanti di e portanan di KIA.
Y ainda falta algun proyecto cu e no kier mishi cu nan pa no causa e partido perde e resto di e almanan solitario cu a keda represente den Parlamento. Pero, warda! Tempo ta coriendo y pronto P.G. lo mester atende tur e casonan ey di ladronicia, corupcion y abuso cu e placa di pueblo, prome cu e ser forza di pak maleta y bay back for di unda el a bin.
Na lugar di kere den e dicho “en boca cerrada no entran moscas”, ata e bocazanan hancho habri y e legion di musca a drenta na granel. Pronto e lista di e nepotismo di NEL lo bolbe aparece den publicidad, y e abusonan cu e terenonan di Pueblo, y Dump, y Lotto, y tanto otro porkeria cu no ta bay keda MEP nada otro cu desaparece for di e panorama politico di Aruba, pa habri caminda pa otro partido o partidonan drechi bin mustra con mester atende cu e asuntonan cu ta di Pueblo.

FUENTE: http://www.diario.aw/2011/08/criticanan-di-mep-ta-parti-di-e-hipocresia-mas-grandi-na-mundo/