Ta durante e Dialogo Social entre gobierno, dunador di trabao y sindicatonan cu Gobierno a presenta un plan di socialisacion di tarifanan di coriente. Cu e socialisacion aki 50% di e usuarionan lo no sinti ningun efecto di cualkier aumento di coriente. Esaki ta algo unico. Nunca antes un gobierno na Aruba a bay asina leu pa yuda un parti grandi di e comunidad aki.
Na mes momento esaki ta tambe un refleho di e vision di Gabinete Mike Eman. Un vision na unda e calidad di bida di e Arubiano ta para central. Aumento sin mas di tarifa di coriente ta algo cu Gabinete Mike Eman ta tratando na tur forma di evita. Otro pensamento di gobierno ta cu si mester aumenta mes cu esaki no tin efecto riba esnan cu ta usa poco coriente.
Dialuna ultimo Prome Minister Mike Eman durante un conferencia di prensa a enfatisa un bes mas cu e aumento di tarifa di awa y coriente lo no conta pa 50% di e poblacion di Aruba. Esaki di tur forma ta un logro grandi. Pa e otro 50% a trata na tene e aumento mas bou posibel.
Pa loke ta e aumento mes ta asina cu esaki ta bay gradualmente. Esnan cu ta usa menos di 500 kilowattuur pa luna lo no sinti ningun efecto di e aumento. Riba 501 kilowattuur te 1000 tampoco lo mira e aumento di 12.5% den nan recibo, pero mas bien un subida marginal di mas o menos 5 cent pa cada kilowattuur te cu e suma di 26,35 Florin.
Evita di usa hopi coriente awor ta bira e reto mas grandi pa tur usuario di coriente. Check e meter di awa y coriente y sea consciente. Pa e usuarionan cu ta usa riba 1000 te 1500 kilowattuur pa luna e prijs ta subi te cu 52,70 maximo cu tampoco ta 12.5%. Asina e prijs ta subi gradualmente. Esaki a worde reparti den 4 scala.
E siguiente ta di 1501 te 2000 kilowattuur cu ta conoce un aumento di mas o menos 79,05 Florin y e ultimo fase ta pa esnan cu ta usa entre 2001 te 10.000 kilowattuur pa luna (3% di e poblacion di Aruba) cu lo mira un aumento riba nan cuenta di coriente di mas o menos 11%. Ta keda na cada ken pa controla su gastonan y purba mas tanto posibel di keda den e prome 50% di usuario di coriente cu no ta sinti ningun efecto di e aumento. Esaki ta loke Gabinete Mike Eman a realisa durante e diferente reunionnan cu WEB y ELMAR y otro partidonan envolvi.
Pa motibo cu gobierno a premira problema cu e prijsnan cresciente di petroleo, for di dia di a asumi gobernacion na 2009 a duna WEB instruccion pa den forma acelera inverti den machinnan economico, pa percura pa bin cu mas energia di biento na Aruba y cu mas lihe posibel mester haci e cambio di fuel oil pa gas natural (LNG) pa laga nan machinnan draai.
Esaki pa percura pa e gastonan di produccion di awa y coriente worde minimalisa, mehorando asina e poder di compra di nos ciudadanonan y tambe reduciendo gastonan di operacion di companianan.
FUENTE: http://www.diario.aw/2011/08/gabinete-mike-eman-a-percura-cu-50-di-e-poblacion-no-ta-sinti-efecto-di-e-aumento/
