Minister Presidente a bisa cu e ta bishitando Aruba pa prome biaha despues cu e refineria a bolbe habri, y esaki ta hopi importante pa dos motibo.
Na prome lugar pa sigui cu e conversacionnan cu gobierno ta hibando cu Valero pa cambia e uso
di combustible for di fuel oil pa gas, y pa Aruba y Valero sigui sincroniza nan esfuerzonan den e mesun direccion riba e tereno aki.
E otro motibo ta cu sr. Klesse ta e persona cu na momento cu e refineria tabata plat, el a keda tene e empleadonan riba payroll, alomenos esnan cu tabata traha directamente pa e refineria, na momento cu e subcontratistanan no tabata tin trabao mas.
E dignatario a corda dia cu sr. Klesse a yame bise cu definitivamente e ta laga e refineria bay pasobra no tin mas perspectiva pe, y el a haci un apelacion na dje, pasobra gobierno tabata den combersacion cu Petro China, hunto cu Minister di Finanzanan sr. Mike de Meza, y el a pidie pa tene mas largo e personal den servicio, pasobra tabata un cantidad di 700 Arubiano cu si a perde trabao, lo tabata dificil pa nan haya empleo na otro caminda, y ademas el a mira hopi dificil si e personanan ey no tabata mas den e operacion di e refineria, pa logra un reapertura sea cu Valero of otro interesado.
“ A sosode na dos ocasion cu sr. Klesse a yama mi back y bisa mi cu awor si el a bira duro pa nan carga, y ultimo bez cu el a yama mi tabata na December, y el a bisa mi cu e no ta bay laga e hendenan bay den luna di December. E ta un persona naturalmente cu sentimento humano, cu a mira cu esey lo tabata hopi doloroso, pero cu na Januari (2010) e lo manda un delegacion na Aruba pa termina e contratonan cu e empleadonan”, Premier Eman a comenta.
December a pasa y ya caba no tabata tin potencial cumprado, anto Minister Presidente a haci un apelacion na Sr. Klesse pa envez cu e delegacion bin termina e contratonan di trahador, bin sinta na mesa y negocia cu gobierno pa wak cual ta e obstaculonan cu tabata tin y busca manera pa resolve esakinan.
“ Señor Klesse a responde constructivamente, e delegacion a bin no pa manda e personanan cas pero nos a sinta, y a reuni pa mas cu un luna te laat anochi, y nos a yega na e MOU, despues na e Settlement Agreement, cual a stipula cu prome cu 1 di Juni nos mester a yega na resolve e problema di BBO cu tabata tin cu Valero, nan lo a paga 200 miyon, e resto lo a wordo exonera, lo a bin un ley fiscal nobo, y kita tur obstaculo pa Valero of otro refineria por a opera e refineria y esaki tabata sin compromiso di reapertura”, Prome Minister a remarca.
Gobierno a cumpli cu tur esaki, trahando hopi duro hunto cu Minister di Finanza Mike de Meza, y sr. Klesse a haya e yamada pa wordo informa, y el a contesta bisando cu Aruba a cumpli, cu gobierno a cumpli, y el a manda un delegacion Aruba pa sinta cu Prome Minister y Minister Mike de Meza pa wak con lo a yega na un reapertura di e refineria.
“ E momento tabata grandi pa Aruba y awor mi ta bay tin e oportunidad di gradici e persona aki, personalmente”, e dignatario a expresa.
FUENTE: http://www.diario.aw/2011/08/prome-minister-contento-di-por-gradicie-personalmente-e-reapertura-di-valero/
