(Aruba) Buceadornan di marina ta en busca di e torpedo Eagle Beach

Desde awe mainta, buceadornan di marina ta bay en busca di un torpedo data di segunda guera mundial aki na Aruba, cu lo mester ta ubica algun caminda den fondo di lama cerca di Eagle Beach. E buceadornan lo bin proximo luna den e area di Caribe pa un ehercisio internacional di buceo “Western Partnership”. Nan yegada ta nifica pa Aruba un posibilidad pa cuminsa cu un intento di buskeda di e torpedo historico aki.
E buceadornan experencia ta specialisa den varios accion di buskeda. Nan lo lansa for di Hr.Ms. Pelikaan cu nan mini submarino cu aparatonan sonar. Cu eseynan nan por busca riba superficienan mas amplio. E chens ta chikito cu por haya e torpedo aki despues di asina hopi aña, debi na e cambionan radical di e fondo di lama. Si e accion di buskeda aki ta exitoso, lo bay delibera cu autoridadnan Arubano pa mira kico lo bay pasa cu e torpedo aki.

E torpedo tin un valor historico importante. Durante operacion Paukenschlag den e di dos guera mundial, submarinonan Aleman a pone curso pa e area di Caribe, pa asina mik riba tankeronan di petroleo y refinerianan. Esey ta loke a sosode tambe den awanan cerca di Aruba. Un U-boot Aleman a torpedea dos tankero di petroleo. Durante e accion aki un di e torpedonan aki a bay riba Eagle Beach. Durante un intento pa haci e torpedo inofensivo, a sosode un tragedia. Riba dia 18 di februari, 1942, cuatro militar a perde nan bida ora cu e torpedo a explota repentinamente. Como muestra di respet na e militarnan fayeci, na februari di aña pasa a devela un anker y un plakkaat na Marinierskazerne na Savaneta.

FUENTE: http://www.24ora.com