Dokter cu a confia Colombiano cu pin code di carchi di banco, a bira victima pa mas di 23.000 Florin

ORANJESTAD (AAN): Diabierna Diego A.P.P y Vladimir C.M a presenta dilanti di huez, debi na e hecho cu nan a worde acusa di horta carchi di banco di un persona na Mei 2011 y cu nan a uza esaki pa horta mas di 23.000 Florin di e persona.
Ta asina cu un dokter femenino tabata tin dos persona Colombiano ta haci trabaonan di construccion na su oficina di dokter esta V.M y D.P y na dado momento el a duna V.M su carchi di banco pa e bay cumpra algun material cu tabata falta.
El a duna V. su pin code tambe, pa e por paga pa e material. V. a duna back e señora su carchi, pero un dia e sra a perde su carchi y ora cu V. y D. tabata den pickup di e dokter un dia pa cumpra mas articulo pa e dokter cu un check cu e dokter a duna nan, nan a haya e carchi di banco benta den e pickup.
E ora ey e fiesta a cuminza.
Nan a uza carchi di e dokter pa bay cumpra varios articulo incluyendo entre otro Black Berry, camara di telefon, paña, joyas y mas.
Nan a lanta placa tambe na diferente occasion.
Riba camara di diferente lugar por a wak Vladimir y Diego ta cumpra cos.

A mira tambe dos muher ta haci uso di e carchi pa cumpra cos.
E carchi di banco di e dokter te hasta a bay Curaçao.
Nan a duna un tal Alex e carchi y na Curaçao el a haci uso di esaki cumprando cos y lantando placa di ATM.

Na dado momento e ATM a guli e carchi y e fiesta a caba.
E dokter a blokea e carchi si, pero no prome cu nan a logra gasta mas di 23.000 Florin di su placa.
Den corte abogado Duijneveld kende ta representa Diego a puntre ken a coi e carchi y el a bisa cu tabata Valdimir a coi e carchi for di riba vloer.

Ora cu huez a puntra Vladimir di esaki el a bisa cu no ta berdad.
El a bisa cu nan a busca den e auto pa wak si nan por a haya e carchi, pasobra e dokter a bisa cu el a perde e carchi.
Segun V., Diego a haya e carchi aki den un compartimento di e pickup.

Huez a puntra ken a bin cu e plan pa keda cu e carchi y haci uso di dje y Vladimir a admiti cu el a dicidi esey.
Ora cu fiscal a bin cu un cambio den e acusacion bisando cu nan lo a horta e carchi for di un jacket di e dokter, tanto Duijneveld como tambe abogado Boyce representando Vladimir a protesta contra esaki.

Huez a puntra e duo ta ken a duna Alex e carchi pa e bay Curaçao cune y Diego a bisa cu ta Vladimir y Vladimir a bisa cu ta Diego.
E dokter a entrega un demanda di 28.000 Florin contra e acusadonan.
Diego ta ilegal na Aruba y despues di 5 luna y mey ainda e ta den detencion.

Vladimir a worde laga den libertad na Juni caba.
Fiscal a exigi contra Diego un castigo incondicional di 8 luna, kitando e tempo cu el a sinta caba.
Banda di esaki fiscal a exigi pa e yuda paga e demanda.
Pa loke ta Vladimir, e fiscal a duna un tipo di splicacion prome cu el a bin cu e exigencia di castigo.

El a splica cu ora cu Diego Sali for di prison, mesora e lo worde deporta pa Colombia door cu e ta ilegal.
Esey ta nifica cu muy probablemente e lo no yuda Vladimir kende si ta biba na Aruba, pa paga e placa back na e dokter.

Pesey fiscal a haya cu ta bon pa exigi un castigo completamente condicional, pa Vladimir kende tin trabao, por sigui traha a asina paga e dokter su placa back.
El a exigi un castigo condicional di 6 luna y 240 ora di trabao pa comunidad.
Tambe el a exigi naturalmente pa e paga e dokter su placa back.

Abogado Duijneveld a cuminza su defensa bisando huez na un manera enfatico cu fiscal ta sinta gaña na corte.
El a bisa cu claramente ambos sospechoso a bisa cu nan a haya e carchi den auto y fiscal ta cambia e acusacion bisando cu nan lo a horta e carchi for di paña di e dokter.

Fiscal a bisa huez cu e ta haya cu e abogado no mester altera asina den corte y ora cu huez kier a bisa Duijneveld locual fiscal a bisa, e abogado a bisa huez cu si huez haya cu e mester baha su voz, e tin cu bise y e lo cumpli cu esaki.

E abogado a sigui bisa cu su cliente a admiti cu el a comete un error y e ta lamenta esaki.
El a bisa si cu e ta haya increibel cu fiscal ta exigi un castigo condicional contra Vladimir, mientras cu contra Diego el a exigi un castigo incondicional.

Tur esaki siendo cu Vladimir a haci mas uso di e carchi.
Duijneveld a bisa si cu su intencion no ta pa huez cera Vladimir, pero no ta husto cu su cliente ta haya un exigencia di castigo mas halto cu e otro sospechoso.

E abogado a bisa cu fiscal pues ta propaganda pa den futuro si un acusado tin cu paga un demanda, e lo haya menos castigo, pa e por Sali mas trempan pa cumpli cu e demanda.
E abogado a bisa cu e no ta kere cu esey ta locual corte lo kier.

Duijneveld a bisa tambe cu mirando cu e carchi a worde haya den e auto, nan no por worde acusa pa ladronicia di e carchi.

El a bisa tambe cu el a haya increibel pa tende cu e mesun dokter cu a bira victima di Diego y specialmente di Vladimir kende a abusa di su confianza usando su pin code, cu e mesun dokter a pidi Vladimir pa sigui cu e trabaonan riba su oficina.

El a traha un acuerdo civil, pa asina atravez di e trabaonan haci na e oficina, e homber page back locual e debe.
Duijneveld a bisa cu door cu e dokter tin un acuerdo civil, su demanda den e caso penal mester worde declara no admisible.

Abogado Boyce tambe tabata di opinion cu no por bisa cu ta ladronicia di e carchi.
E no tabata di acuerdo tampoco cu e suma di e demanda.

El a bisa si cu su cliente door di haci trabaonan pa e dokter, a baha e debe cu 1800 Florin caba.
Actualmente Vladimir ta AO si y el a bisa huez cu e lo ta AO te cu dia 28 di December, pero cu e kier sigui traha pa e dokter banda di su trabao, pa e por paga e dokter back.

E dokter a bisa huez si na final cu e no tin confianza mas den e areglo ey y cu e kier pa nan cumpli cu su demanda.
Huez a bisa cu e ta bay pensa riba e caso y duna su veredicto riba dia 9 di December.

FUENTE: http://www.diario.aw