Kònsùl di Venezuela Sra. Sonia Jacqueline Alvarado Rossel, Direktor Gerente di Refineria Isla Sr. Manuel Medina i tambe Promé Minister di Kòrsou Gerrit Schotte a dirigí palabranan di éksito den direkshon di e deportistanan pa e torneo ku lo tuma lugá djaweps, djabièrnè i djasabra.
Durante e tres dianan aki diferente trahadó di PDVSA rònt Venezuela ta di bishita na Kòrsou pa kompetí ku deportistanan lokal di Refineria Isla Kòrsou den e deportenan di Bolas Criollas, Dominó i Sòftbòl. E programa a kuminsá ku un desfile di selekshon di e 3 deportenan ariba menshoná riba e vèlt di Pòst 6.
Aña pasá deportistanan lokal a biaha pa Venezuela i a kompetí ku trahadónan di PDVSA bibando na Venezuela. E aña aki ta bùrt pa e Venezolanonan hasi un bishita na Kòrsou. Asina e nòmber "Interkambio Deportivo Refineria Isla y PDVSA" a nase. Aparte ku e weganan ta stimulá e kontakto entre trahadónan di Refineria Isla Kòrsou i PDVSA e weganan ta kontribuí tambe na preparashon di e deportistanan pa ku e torneo grandi "Juegos Nacionales Petroleros".
E kulminashon di e torneo lo tuma lugá djasabra ora e weganan final ta tuma lugá. Refineria Isla ta invitá pueblo di Kòrsou pa bin gosa di e weganan i alabes apoyá e deportistanan tantu lokal komo esnan ku ta di bishita for di Venezuela.
FUENTE: http://www.24ora.com
