Mihor perspectivanan tin awor, pa explora petroleo den lama profundo na Aruba

ORANJESTAD (AAN) – Director di e Compania di Petroleo Aruba, tambe a participa den e Green Conference, y el a worde acerca pa DIARIO, cu e pregunta si e ta kere cu den nos awanan teritorial por tin petroleo, mirando cu un Minister Hulandes a laga sa cu na Antiyas tin esaki.

Encuanto e pregunta aki el a contesta cu su compania ta bastante avanza pa cera contrato cu algun compania pa nan cuminza haci e trabaonan di exploracion, cual ta inicia cu trabaonan sismico y interpretacion di esaki pa asina e proceso di exploracion sigui desaroya su mes.
El a splica cu e trabao di investigacion sismico ta pa sa net na unda mester pone e aparatonan pa bora, y pa haci esaki mester bin cu un barco sismico cu ta procesa e datonan y haci tur e interpretacionnan y asina ta purba combina e datonan cu otro lugarnan cerca di nos isla, pa pone tur esaki den un contexto di geologia regional, incluyendo e datonan di e campaña di exploracion cu tabata tin di Aruba den añanan 89-90.
Esaki ta pa cuminza purba anticipa cu tin un sistema petrolero, esta, cu tin condicionnan cu a genera petroleo y zorg pa e petroleo cu a worde genera worde acumula y warda un caminda, y determina e lugarnan mas adecua pa haci e testnan di boramento.
En todo caso, preparacionnan ta tumando lugar pa ora di cera contrato cu un compania esaki ta un bon contrato, segun sr. Curet a splica. E perspectivanan actualmente ta hopi mas grandi cu loke tabata tin den e añanan 89-90 cu no tabata tin e ekiponan rekeri pa explora den un parti sumamente profundo di lama y awor tin un area nobo cu ta masha interesante pa explora. Curet a bisa tambe cu no mester lubida cu nan a haci un descubrimento di gas natural den e Golfo di Venezuela, no hopi leu di nos
Isla.
Señor Armando Curet ta haya cu ta bal la pena pa un segundo oportunidad pa explora. El a bisa cu e trabaonan aki ta rekeri di hopi inversion y cu no sa kico su resultadonan ta bay ta. Kiermen, cu e companianan ta bay hopi cuidadoso prome pa wak cuanto trabao nan ta bay haci y cuanto placa nan ta bay inverti.
Sr. Curet ta mira cu e trabao tecnico, esta e parti sismico, lo por cuminza hopi rapido cune, y el a referi na inicio di e proximo aña. E exigencianan cu tin pa duna un compania e contrato pa exploracion ta cu e mester ta un compania serio, cu experiencia den e tereno aki y cu recursonan tecnico y financiero pa por desaroya e trabao.

FUENTE: http://www.diario.aw