Coincidencia ta cu S.E. Gobernador Sr. Refunjol ta ex-alumno y ex-cabesante di Colegio Sagrado Curazon, Sra. Lilith Rasmijn ta ex-alumno y actual cabesante y Srta. Jennifer Larmonie ta ex-alumno y actual studiante na IPA. S.E. Gobernador den su discurso a splica e historia di Colegio Sagrado Curazon y becindario na e grupo grandi di alumno.
Awe dicho school ta e school basico mas grandi na Aruba cu no menos cu 18 klas!
Despues cu bandera a wordo hisa, himno a ser canta pa e alumnonan di Sagrado Curazon y palabra di bonbini door di e cabesante Sra. Rasmijn, S.E. Gobernador cu hopi placer a entrega e ‘Maletin di Tesoro’, na Sra. Rasmijn y alumno William Arismendi.
Sra. Rasmijn a ricibi e Maletin y ta gradici S.E. Gobernador, caminda el a expresa: “Cu Colegio Sagrado Curazon ta hopi honra y sumamente contento cu bishita di Su Excelencia”.
Na su turno Presidente di Comision Celebracion 25 aña Status Aparte, Sra. Alice van Romondt, a gradici S.E. Gobernador Refunjol pa su presencia y su tempo dedica na su school di antes y p’ a comparti un tiki di e historia di e school y di e bario na e alumno- y maestronan presente.
E ‘Maletin di Tesoro’ ta forma parti di e recuerdo di Celebracion di 25 aña di Status Aparte y cu Comision ta spera cu e schoolnan basico lo sa di haci e maximo uso di e contenido valioso! Tambe Sra. Van Romondt a laga sa cu e Maletin lo wordo duna tambe na diferente instancia den nos comunidad.
Cu e proyecto aki Comision Celebracion 25 aña Status Aparte y Gobierno ta spera cu e Maletin sirbi na yena e muchila di sabiduria y conocimento di cada mucha y hoben y aporta na e balor y amor pa nos simbolonan nacional, manera nos moneda, nos formacion estatal, nos idioma Papiamento, y nos Himno y Bandera.
E proyecto aki a sali for di un deseo y idea di Sra. Alice Van Romondt, presidente di Comision cu lo ta na bienestar di e alumnonan den realizacion cu nan mes ta e berdadero tesoro di nos pais Aruba.
Poesia:
Mucha dushi, abo sa?
Tesoro precioso di Aruba bo ta!
Sigui carga nos bandera
Abo ta futuro di nos Dushi Tera
No tin duda, sigur bo por!
Djis duna Aruba bo … AMOR..
Sra. Gina Ramirez
FUENTE: http://www.diario.aw
