(Aruba) Tierra del Sol Real Estate N.V y Golf Course N.V, sentencia pa paga miles di dollar na Masters Association

ORANJESTAD (AAN): Diaranzon veredicto di huez a cay den un caso entre Tierra del Sol Homeowners Association, Tierra del Sol Real Estate N.V y Tierra del Sol Golf Course N.V.
Ta asina cu TDS Homeowners Association ta consisti di e habitantenan cu tin derecho di erfpacht riba un tereno cu cas na Tierra del Sol. E asociacion ta atende cu interesnan di e habitantenan.
Tierra del Sol Real Estate N.V ta propietario di e area comercial di Tierra del Sol, mientras cu Tierra del Sol Golfcourse N.V propietario di e Golfcourse. Riba 27 di Juni 1996 e organizacion Tierra del Sol masters Association a worde lanta, cu ta representa tur e gruponan ariba menciona.
Pues tanto Golfcourse, Real Estate y Homeowners ta forma parti di e Masters Association.
Tur e partidonan cu ta forma parti di e asociacion aki tin cu paga tur aña placa di membrecia, pa nan worde representa pa e Masters Association.

Sinembargo segun e homeowners, pa añanan largo Golfcourse N.V y Real Estate N.V no tabata contribui cu e pagonan aki. Door di esaki, Masters Association cu tin cu representa nan tur, a cay den problema financiero y no por a sigui haci su trabao debidamente.

Pa e motibo aki e propietarionan di tereno y cas na Tierra del Sol(Homeowners Association) a lanta un caso. E caso a worde trata riba 24 di Januari y Diaranzon huez a duna su veredicto.
E huez a bay di acuerdo cu peticion y exigencianan di e Homeowners Association y a dicta cu Tierra del Sol Real Estate N.V tin cu paga Masters Association 93.409 dollar, kitando e pagonan cu nan a haci si despues di dia 30 di Juni 2010.

Si nan no cumpli nan lo tin cu paga un asina yama ‘dwangsom’ di 1000 dollar pa cada dia cu nan no cumpli, te cu un maximo di 30.000 dollar.

Huez a dicta tambe cu Tierra del Sol Golfcourse N.V tin cu paga Tierra del Sol Masters Association e suma di 689.135 dollar, kitando locual nan a paga caba despues di 30 di Juni 2010.
Si nan no cumpli nan tin cu paga 1000 dollar tur dia, te cu un maximo di 30.000 dollar.

Ademas di esaki Golfcourse y Real Estate tin cu paga e gastonan di corte, como e partidonan perdedor.

FUENTE: http://www.diario.aw