“E situacion di petroleo ta uno masha dificil riba mercado internacional cu tin su efectonan pa economia y mercado di Aruba tambe”, de Meza a bisa. Si compara productonan di diez aña pasa cu awe, por mira un diferencia evidente. De Meza “Esaki ta dificil y dramatico pa e mercado di Aruba. No tin un pais na mundo su so cu por controla esaki, ya cu tur hunto ta participe na e prijs halto di crudo.
Tin diferente razon cu e prijs di crudo ta asina halto y esaki a haci tambe cu operacion di refinerianan rond mundo a bira masha dificil cu a pone cu varios di nan a sera nan porta”.
Aki Minister de Meza a referi entre otro na e refineria na St. Croix ‘Hovensa’ cu ta e refineria mas grandi den region cu a stop cu su operacionnan.
E perdida di placa di e ultimo tres añanan cu tabata riba 1.5 biyon dollar tabata e razon principal pakico a tuma e decision drastico aki.
Bayendo bek na e refineria di Aruba Minister de Meza a ilustra cu e refineria aki tambe ta pasando den momentonan sumamente dificil. “Si mira cu e refineria ta opera riba crudo pisa y si tuma na cuenta cu e prijs di crudo pisa cu semper tabata hopi mas bou cu e prijs di crudo leve (cu tin un percentahe di azufro hopi mas bou) ta aumentando hasta cu e diferencia entre e crudo pisa y esun leve ta yegando hopi cerca di otro.
Na fin di dia e producto cu ta worde produci for di e crudonan aki ya no tin diferencia entre nan”. Esaki ta e splicacion masha cla mes cu Minister a duna pa ilustra con e refineria di Aruba ta worde afecta.
“E situacion na Aruba ta hopi preocupante. Esaki a conduci cu Gobierno di Aruba, Prome Minister Eman, colega Minister Winklaar y mi persona ta haciendo diferente esfuerso pa wak si den region – ya cu ta den region tin e crudo pisa cu ta miho pa nos refineria – por haya e crudo aki”.
De Meza a duna un enumeracion di e paisnan cu a worde bishita caba y tambe a bisa cu nan a bay e oficina principal na San Antonio. Hulanda tambe ta envolvi den e situacion aki y unda cu e delegacion di Aruba a bay nan a haya sosten y ayudo di e embahadanan Hulandes. “Nos ta purba di tur forma haya un solucion pa e refineria”, asina de Meza a bisa enfaticamente.
Minister de Meza “Durante e bishita na Brazil e Minister di Energia a duna muestra di gran interes. El a haya aprobacion pa habri e filenan back di e refineria. A tuma contacto cu Petrobras y awor nos ta wardando riba un reunion cu Petrobras y ehecutivonan di Valero cu si tur cos bay bon ta tuma lugar otro siman. Tambe nos a sinta cu e Minister di Energia y Minas di Colombia y Prome Minister Eman tabatin un encuentro personal cu Presidente Santos di Colombia. Eynan nos a papia cu Presidente di Ecopetrol. Esaki tabata un reunion hopi positivo.
E Minister di Energia y Minas a bisa di ta desea pa studia e scenario di Aruba un bes mas. Esaki cu bendicion di Presidente Santos”. Aki Minister de Meza ta referi na e hecho cu den pasado Ecopetrol tabata interesa den e refineria di Aruba.
E bishita na Colombia a conduci na e cumbre cu a tuma lugar siman pasa na Aruba cu a worde yama “Oil and Gas Summit”. Na e cumbre aki tabata presente e ehecutivonan mas halto di Valero, di Ecopetrol, di GasUnie, di Repsol, di Anthony Veder (compania di transporte di gas), representantenan di Gobierno di Colombia tabata presente y automaticamente tambe Gobierno di Aruba representa pa Prome Minister Eman, Minister Winklaar y Minister de Meza y varios consehero.
Minister de Meza a bisa cu e presentacionnan tabata interesante, nan a worde sigui pa discusionnan riba varios tema. “Na fin di dia nos a yega na diferente posibel scenario cu ainda mester worde studia. Un di nan por ta un joint venture entre Valero y Ecopetrol. Ecopetrol tabata hopi interesa tambe pa bin cu gas for di Colombia hunto cu GasUnie y Repsol.
Repsol muy problamente ta bay haci exploracion riba gas den e awanan teritorial di pais Aruba. A tira un bista tambe riba e diferente scenarionan, pasobra ta papia riba LNG (gas natural likido) y tubonan di gas for di Colombia pa Aruba”.
PAKICO GAS?
Minister a duna un bista tambe pakico ta papiando di gas na e momentonan aki. “Si tuma e fuel oil cu ta worde usa na Aruba pa genera coriente y converti awa salo den awa potabel den WEB y si tene na cuenta cu ta e mesun fuel oil aki ta worde usa den e refineria, e fuel oil ta costa mas o menos entre 17 pa 19 dollar y LNG ta entre 10 pa 11 dollar y ora ta papia di NG (Gas Natural) e prijs ta entre 3 pa 5 dollar pa un miyon di fuel oil equivalent barrel. Ta papia aki di un diferencia masha grandi y pesey ta interesante pa Aruba bay den e direccion di gas.
Casi tur of kizas hasta tur refineria na Merca awe ta operando riba gas como combustibel pa genera nan energia. Na Aruba esaki no ta e caso ainda y pesey cu e gastonan ta hopi grandi”.
Segun Minister de Meza aki por papia di un incentivo pa aña cu facilmente ta core entre 200 te riba 400 miyon dollar si bay di fuel oil pa LNG y di LNG pa Gas Natural”.
FUENTE: http://www.diario.aw
