Henrique Capriles Radonsky rival di Hugo Chavez na October

ORANJESTAD (AAN): Ayera diadomingo, e venezolanonan cu gran expectativa y den un ambiente trankil a bay urna electoral pa asina elegi e pre-candidato presidencia cu lo ta rival di Hugo Chavez den e proximo eleccion pa presidente di Venezuela cu lo tuma lugar na October.
Pa e ocasion aki, 18,2 miyon venezolano a haya pa prome biaha e oportunidad di elegi e candidato presidencial di oposicion y na e postulantenan na 17 gobernacion y 249 alcaldia.
Durante e eleccion primario aki tabata tin como pre-candidatonan e gobernador di Miranda, Henrique Capriles Radonski (39 aña), e gobernador di Zulia Pablo Perez (42); e congresista independiente Maria Corina Machado (44), e ex-embahador pa ONU Diego Arria (73) y e ex-diputado Pablo Medina (64).
E afluencia di votadornan tabata masivo y e encuestanan a señala Capriles faborito. Capriles ta un abogado centro-izquierdista cu ta supera pa mas di 10 punto porcentual na su cercano rival, Pablo Perez.

Na Aruba, e residentenan venezolano tambe a bay eherce nan derecho di voto. 150 persona a vota y segun conteo, e preferencia a ubica Henrique Capriles tambe como e faborito aki na Aruba.

E resultadonan di e votacion a posiciona Capriles cu 1.806.860 voto como e ganador y e persona cu lo enfrenta Hugo Chavez na October proximo. Pablo Perez a haya 867.601 voto, Maria Corina Machado (103.500), Diego Arria (35.070) y Pablo Medina (14.009). A conta cu e participacion di 2.904.710 elector.

FUENTE: http://www.diario.aw