(Aruba) Prome Minister cu expectativa grandi cu Petrobras tambe lo tey hunto cu Ecopetrol den reunion cu Valero

ORANJESTAD(AAN): Como resultado di e bishita di Prome Minister Mike Eman y su delegacion na Colombia, na cuminzamento di e siman aki, e proximo 24 di Februari un delegacion di Ecopetrol lo ta na Aruba pa reuni cu Valero, y e mandatario tin un expectativa grandi cu Petrobras tambe lo forma parti di e reunion importante aki.
Minister Presidente Mike Eman ta gradici cu e trabao di introduccion cu un grupo di Arubiano di bon boluntad, di e sector empresarial a haci na Colombia algun siman pasa, den un gira comercial y cu pa peticion di gobierno a papia cu personanan importante na Colombia, tocante e asunto di nos refineria. Ademas, un delegacion di Parlamento encabeza pa Donny Rasmijn y Juan David Yrausquin tambe a bay Colombia cu un mision similar, poco siman pasa, sin kita merito na e gestion di e Embahadanan di Reino na Washington, Colombia y Brasil cu a trece dilanti na un manera hopi cla e parti di Aruba su sentido y convivencia y solidaridad.

Prome Minister Eman a bisa cu esaki a mustra un scenario caminda Aruba ta ofrece pa entrada di Colombia den Reino Hulandes, cu e idea di un brug cu Aruba por forma y e oportunidadnan cu Aruba ta brinda, y cu awor ta e momento cu e relacionnan aki ta demostra nan balor, pasobra tur e puntonan aki a bin hunto na e momento oportuno y a trece un compromiso politico di parti di Colombia pa busca hunto cu nos, un solucion pa e situacion di nos refineria.

Nada ta concreto ainda, y esaki e mandatario a bisa bon cla, pasobra loke nos delegacion a logra na Colombia ta un cambio di pensamento cerca e empresanan cu den pasado a worde acerda pa Valero pero cu awor a pone tur cos den un contexto hopi mas positivo, contando cu un apoyo grandi di Presidente Santos, Minister Cardenas entre otro dignatarionan politico y empresarial cu si ta kere cu mester mira e oportunidadnan cu Aruba su refineria ta ofrece, den un perspectiva mas amplio cu como solamente un refineria.

Tur e informacion aki bon elabora a logra cu ehecutivonan di Ecopetrol ta bin Aruba dia 24 di Februari, pues otro siman, pa reuni cu Valero y gobierno ta haciendo su maximo esfuerzo pa conta tambe cu presencia di Petrobras den e meeting aki, y gobierno ta wak un posibilidad di un asociacion entre tur dos compania. Segun Minister Presidente Eman si Valero mes no ta interesa pa sigui mas, Ecopetrol y Petrobras ta candidatonan hopi fuerte cu tin e petroleo of crudo pisa cu nos refineria mester pa logra su continuidad.

FUENTE: http://www.diario.aw