Petrobras a mustra gobierno di Aruba cu nan interes ta pa inverti den nan propio pais

ORANJESTAD (AAN) – Den conferencia di prensa di gobierno, dialuna mainta, Prome Minister mr. Mike Eman a señala cu dentro di e esfuerzonan grandi cu nan ta haciendo pa busca un solucion, pa e problema grandi cu Aruba su refineria ta pasando aden, den e bishita na Brazil a hiba combersacionnan cu e empresa petrolero grandi e pais aki, Petrobras.
Den e combersacionnan aki gobierno di Aruba a bolbe haya e mensahe cla cu nan pensamento ta mas tanto riba inversionnan den nan propio pais, pa loke ta trata refinerianan nobo of expansion di esnan existente.

No obstante, si a worde mustra interes den e contexto mas grandi cu gobierno di Aruba ultimamente a cuminza plantea den e retonan pa nos refineria.

“Nos a sinti hopi tempran, ora nos a cuminza atende cu e retonan cu nos refineria tin, cu na e momentonan aki simplemente no ta rendable y e ta perdiendo placa, cu un oferta unda cu nos ta pone e solucion di e refineria solamente den e contexto di su potencial, ta na e momentonan aki no mucho atractivo pasobra ken cu draai e refineria sea Valero, Ecopetrol, Petrobras of PDVSA, tur di nan na un forma of otro, lo tin e mesun reto aworaki cu e refineria ta paga un suma pa e crudo y ora cu e saca e productonan final (den un situacion basta particular cu nos tin na e momento aki y cu nos no sa con largo e ta bay dura), no ta rindi pa un entrada mas halto cu locual e ta paga pa crudo”, Premier Eman a relata. Kiermen cu e prijs di costo ta mas halto cu loke ta worde genera despues di un proceso di refinacion.

E dignatario a bisa cu logicamente esey no ta un situacion cu tin semper. E hecho cu e refineria a habri back, despues cu gobierno a soluciona tur e dificultadnan cu tabata tin entre e gobierno anterior y Valero, ta un ehemplo cu no semper e refineria ta den un situacion desventahoso pa cu e prijs di crudo y e prijs di e productonan final.

Prome mandatario a señala cu esaki ta un situacion ciclico. El a sosode mas bez den historia y probablemente lo ripiti den futuro, y pa e motibo aki mes, pa busca un solucion pa e refineria, gobierno ta pensa cu mester pone den un contexto mas amplio di buskeda di partnernan di energia cu tin crudo, cu tin tecnologia pa exploracion di energianan nobo, y tambe cu tin e mercado pa por bende e productonan aki, y den e contexto aki gobierno tabata tin e prome “summit” na Aruba, unda cu a invita Ecopetrol y Rebsol cu ta e candidato mas adelanta awor pa haci exploracion di petroleo y gas den nos awanan teritorial, y probablemente mas gas cu crudo.

FUENTE: http://www.diario.aw