Esaki a worde haci bou guia di ATIA y FIESP, cu ta e Federacion di Industria di Estado di Sao Paulo. Prome Minister Eman a uni su mes na e delegacion di Aruba y a duna un charla, despues di a ricibi un reconocimento di FIESP den forma di un ‘award’.
Eman a bisa cu pa Aruba como un isla chikito ta importante pa reinforsa lazonan cu un pais asina special y cu un economia cresciente manera Brazil. Brazil actualmente ta un pais cu ta marca pauta y convertiendo su mes den e ehempel pa mundo.
“Ta masha poco pais na mundo por bisa cu nan tin campeonato mundial y weganan Olympico den nan pais”. Eman a bisa cu Aruba ta masha orguyoso di tin un pais manera Brazil como amigo.
Eman “Nos ta aki cu un curazon yena di deseonan pa comparti nos isla cu boso”. Kico Aruba tin pa ofrece Brazil, asina Eman a puntra den bos halto.
“MI ta kere cu esaki ta un pregunta masha valido na e momentonan aki y cu tur hende tin derecho di haci su mes. Si mira e grandura di Aruba y esun di Brazil bo por haci bo mes e pregunta si tin oportunidad den un relacion di Brazil cu Aruba ya cu esun di Aruba cu Brazil ta masha logico. Pesey un bes mas, kico Aruba tin pa ofrece Brazil??”
Prome Minister a contesta e pregunta aki bisando cu aunke cu Aruba ta un isla masha chikito, tur hende ta keda sorprendi pa tende cu anualmente Aruba ta haya 1 miyon y mey di turista bishitando e isla. Aruba tin un cifra masha halto – podise hasta e mas halto di mundo – di turistanan cu ta keda bin cu vacacion. E asina yama ‘repeated guests’. “Esaki ta muestra di clientenan satisfecho cu ta bisa masha hopi mes”.
E cifra aki ta indica cu e servicio cu ta worde ofreci na Aruba ta uno excelente cu ta pone e turista bin back. “Esaki banda di nos bunitesa natural cu nos a haya di nos Creador”, asina Eman a bisa su audiencia.
“Nos ta mira cu Aruba por ta un ‘gateway’ importante pa Brazil pa loke ta regarda nos region. Tambe nos por ofrece un aceso importante pa Reino Hulandes y Europa pa mercancia y servicio di Brazil. Loke mi ta kere sigur den dje y mi a comparti esaki tambe cu e presidente di FIESP, ta cu nos tin un balor agrega importante pa Brazil, esta converti Aruba den un ‘show case’ pa producto y servicio di Brazil.
Un otro parti atractivo na cua Aruba por contribui na dje ta cu nos ta un destinacion na unda hende facilmente ta bin”. Eman a bisa cu Aruba ta masha conoci y esaki ta un bentaha grandi. Ta pesey cu Brazil por haci di Aruba un skina di exhibicion pa etala su serivio y productonan.
“Boso ta invita e mundo eyfo pa bin Aruba pa topa cu boso entrepreneur, boso lidernan di negoshi pa haya un presentacion di boso producto. Mi ta definitivamente confidente cu boso ta bay tin un exito grandi”, asina Eman cu pasion a contesta e pregunta kico Aruba tin di ofrece Brazil.
Un di e cosnan riba cua Brazil por cuminsa traha concretamente, asina Eman a bisa, ta pa organiza na Aruba un evento di exhibicion – podise a base annual – y Aruba ta invita e region y Europa pa bin aki y topa cu boso hendenan, mira boso producto y mira kico boso tin di di ofrece. “Esaki ta un compromiso concreto di Gobierno di Aruba”, Eman a accentua.
FUENTE: http://www.diario.aw
