El a duna di conoce cu e ta bishita e lugar promer cu e evento tuma lugar mirando cu ta trata di algo grandi pa Aruba, ya cu e ta un di e 5 eventonan cu ta worde organiza den e low season di aña pa atrae turistanan pa Aruba.
E mandatario a indica cu aña pasa no tabata completamente contento cu e cantidad di hende cu a bin y e calidad di show, pero cu di erornan por siña. Teniendo na cuenta cu awor e formato di contract a cambia, caminda ta evalua e resultado di e evento aña pa aña, algo cu no tabata tuma lugar anteriormente, a papia cu Mark Adkins y henter e organizacion di Soul Beach pa duna e oportunidad pa drecha cosnan caminda cu mester. Esaki ta conta tambe internamente caminda a tuma e decision di cambia e sitio di e evento, despues di dos aña cu a tuma lugar na Joe Laveist na San Nicolas, a bin back na un beach. E decision aki a worde tuma riba demanda di e hendenan cu tabata kier e evento riba beach, manera e nomber mes ta bisa.
Minister Oduber a sigui bisa cu e aña aki un biaha mas ta bay tin un evento di un caliber haltisimo cu artistanan sumamente renombra cu ta ganadornan di diferente award na Merca. Banda di esaki e respuesta di comunidad Mericano tabata uno enorme atrobe caminda a bende riba 4500 entradanan online. Ya caba for di diamars por a mira e cantidad grandi di hendenan cu tabata yegando pa e evento for di Merca y diaranson cu diahuebs esaki a aumenta mas ainda.
Tur e vuelonan tabata sold out y hasta ta conta e biaha aki cu vuelonan charter pa nos isla for di Merca, Suriname y Curaçao caminda e ultimo cifra conoci ta indica cu riba 1400 persona ta bin Aruba pa Soul Beach. Esey kiermen cu en total ta premira cu alrededor di 6 mil persona ta yegando Aruba for di exterior pa presencia e evento anual aki.
Manera tur hende sa, Minister Oduber tin un aprecio special pa San Nicolas y asina a pone un evento pariba di nos isla tambe. E apertura di Soul Beach lo tuma lugar diahuebs anochi durante Carubbian Festival. Lo bay tin DJnan di Merca cu ta bay mix cu e fiebre Caribense cu ta worde sinti durante Carubbian Festival. Diadomingo tambe ta bay tin un beach party na Baby Beach durante dia y asina laga nos bishitantenan disfruta di e parti pariba di nos isla.
E decision pa no realiza e conciertonan na San Nicolas mas a bin despues di evaluacion di dos aña caminda e hendenan en berdad tabata bay pariba, pero asina e conciertonan caba nan ta bin abou back sin cu San Nicolas a gana algo cune. Awor e conciertonan ta tuma lugar riba beach, manera tabata e peticion, pero tambe ta hiba e personanan San Nicolas durante un Carubbian caminda tiendanan y tur esnan cu tin nan stand por sali beneficia, mientras cu nan ta conoce un poco mas di nos cultura y cuminda. “E spinoff ta hopi mas grandi pa economia di nos isla di e forma aki combina cu e fiesta diadomingo na Baby Beach. Nos ta kere cu e combinacion aki tabata perfecto, y bo ta mire…e la recupera fuertemente den mercado y awe nos ta papiando di casi 6 mil hende pa e evento di Soul Beach”, Minister Otmar Oduber a duna di conoce.
E mandatario a gradici organizacion di Soul Beach, Sr. Mundo Albus cu ta un persona cu for di ora cu a bin cu Sinbad ta envolvi. Tambe el a gradici Chido Henriquez, personal di DOW, Elmar, Setar y tur otro cu ta yuda cu e evento aki cu ta pa Aruba.
FUENTE: http://www.diario.aw
