Petro China lo por tin efectonan positivo pa Aruba su turismo y trafico aereo

ORANJESTAD (AAN): Recientemente durante un entrevista cu Minister di Turismo, Transporte y Labor, Otmar Oduber e mandatario a indica cu el a dialoga cu halto ehecutivonan di Petro China riba e posibilidad pa crea un avenida entre China y Aruba, esaki en coneccion cu e posibel restart di e refineria.
Na e momentonan aki vuelonan for di China pa Aruba ta dura mas cu 40 ora incluyendo stop na varios pais. Cu vuelonan directo for di China pa Aruba esaki lo por worde reduci te cu 14 ora, cual ta haci Aruba sumamente atractivo pa e mercado Chines cu ta uno grandi y cu interes halto pa biaha debi na cantidad di negoshinan cu Chinesnan ta haci rond di mundo. Un otro aspecto cu ta haci Aruba atractivo y ideal pa worde usa como un hub ta e pre clearance Mericano cu por worde haci na Aruba mes, di e forma aki haciendo e proceso di vuelo uno mas rapido.
Por mira cu no solamente e aspectonan di e refineria ta importante pa Aruba su economia y labor sino tambe efectonan positivo cu e refineria lo por trece pa turismo y trafico aereo. Specialmente for di e capital Beijin cu ta un mercado hopi interesante mirando cu su ingreso per capita ta uno sumamente halto.

Minister Oduber a indica cu den un futuro sercano lo mira e posibilidadnan pa reuni cu ehecutivonan Chines y bishita Air China pa dialoga riba e posibilidad y interes pa usa Aruba como un hub entre e paisnan Latinoamericano, Caribe y Merca. Di e forma aki Minister Oduber kier habri un porta mas pa Aruba cu lo por trece benificionan economico pa nos isla.

FUENTE: http://www.diario.aw