Un di e narcotraficantenan mas busca di Colombia a entrega su mes na Aruba

Un noticia cu tabata riba internet den tur media internacional ayera tabata esun relaciona cu e caso di e presunto narcotraficante Javier Antonio Calle Serna aki na Aruba.

Calle Serna conoci como “Comba” of “El Doctor” di 43 aña tabata un di e “caponan” mas busca na Colombia y el a entrega su mes na e agentenan antidroga di Merca (DEA), segun informacion di Polis Nacional di Colombia.
E detencion a keda registra den tur secrecia aki na Aruba diabierna ultimo y for di akinan el a ser traslada pa New York, unda hudicialmente e ta worde rekeri pa e delito di narcotrafico y labado di placa.

E narco a yega di controla e rutanan di narcotrafico atravez di e pacifico colombiano y na 2004 a fortalece e nexonan cu cartelnan mexicano manera esun di Sinaloa y Los Zetas cu cual a establece alianzanan pa saca e droga for di Merca atravez di Venezuela y Centroamerica y sigur Caribe (lesa articulo apart relaciona cu Aruba como ruta di droga).

“Comba”, segun media internacional, tabata tin hopi presion di e gobierno colombiano y di polis, pesey el a entrega su mes, aparentemente despues di un negociacion.

Te cu awor, autoridadnan di Aruba no a duna ningun declaracion al respecto. Na Colombia, mientrastanto a ser teni un conferencia di prensa pa duna detayenan di e detencion di “Comba”.

Calle Serna tabata lider hunto cu su ruman Luis Enrique, di un clan familiar cu tabata tin bao nan encargo e banda conoci como “Los Rastrojos”, un di e organizacionnan cu a surgi despues di e disolucion, na 2006, di e paramilitarnan Autodefensas Unidas de Colombia (AUC).

Autoridad colombiano y internacional ta acusa e banda Los Rastrojos di tin nexonan cu e cartel mexicano di Sinaloa, como tambe di proteha e costaricense Alejandro Jiménez (Palidejo), kende a ser deteni na maart na Colombia pa e asesinato di e trovado argentino Facundo Cabral aña pasa.

“Comba” tin un trayectoria den e mundo di droga cu a cuminza den e decada di 80 den e guerrilla Fuerzas Armadas Revolucionarias de Colombia (FARC).

Despues, den decada di 90 el a traha cu Wilber Varela (“Jabón”), di kende e tabata e man drechi. E rumannan Calle Serna ta parti di e grupo di narcotraficantenan mas busca di Colombia, y pa cual e Gobierno a ofrece 5.000 miyon di pesos (mas di 2,84 miyon dolar) pa informenan cu lo por a hiba na nan captura.

E subdirector di Polis di Colombia a adverti cu e gobierno colombiano y su institucion lo sigui eherce presion riba e narcotraficantenan y terorista, tanto na escala nacional como internacional, cu e cooperacion di e forzanan di seguridad di otro paisnan.

FUENTE: http://www.diario.aw