Corte a dicta na fabor di empleadonan di Fly Aruba

ORANJESTAD (AAN): Diaranzon huez a duna su veredicto den un caso sumario cu empleadonan di Fly Aruba N.V a entama contra e compania.
Ta asina cu riba dia 16 di Januari 2012 Fly Aruba a cerca un acuerdo cu un grupo di persona.
E acuerdo ta yama ‘Pilot in Training Agreement’, pues Fly Aruba a compromete su mes na duna e asina yama pilotonan aspirante un training y e acuerdo ta encera cu durante e periodo aki di opleiding, cada un lo ricibi un salario di 3000$ bruto pa luna.

E opleiding lo tabata planea pa dura 40 ora pa siman.

Riba dia 6 di Februari 2012 a cera un acuerdo tambe cu un cantidad di persona pa nan bira stewardess.

E acuerdo aki yama ‘Flight Attendant in Training Agreement’.

A worde palabra cu e personanan aki lo worde paga 900$ mensualmente durante e periodo di e opleiding.

Tur e piloto y stewardessnan aspirante a presenta na diferente occasion riba e horario stipula pa Fly Aruba pa ricibi instruccion of haya parti di e opleiding.

Sinembargo atravez di un carta riba dia 24 di Mei 2012, Fly Aruba a notifica cada un di e personanan cu nan ta termina e acuerdo.

E personanan cu a entama e caso sumario ta di opinion cu e acuerdo cu nan a firma mester worde considera como un acuerdo di trabao y como tal Fly Aruba no por djis para e acuerdo sin pidi un permiso special pa termina e acuerdo di trabao.

Fly Aruba tabata di opinion cu aki no ta trata di un acuerdo di trabao (arbeidsovereenkomst) y cu pesey e carta di terminacion di e acuerdo mester worde considera valido.

E grupo di empleado a pidi huez tambe cu si e haya mes cu no ta trata di un acuerdo oficial di trabao, pa Fly Aruba toch paga nan salario.

Locual huez mester a evalua den e caso aki ta cu si e opleiding cu a worde palabra, mester worde considera como ‘trabao’.

Ley ta bisa cu si e opleiding ta claramente mas tanto na beneficio di esun cu ta sigui e opleiding, e ora ey bo por bisa cu no ta trata di un acuerdo di trabao.

Como cu den e caso aki e opleiding tabata pa forma piloto y stewardess, cu tabata necesario pa e compania por cuminza bula y opera, huez ta bisa cu e opleiding tabata mes importante pa e compania tambe.

Pues huez a bisa cu e ta haya cu ta trata aki di un acuerdo di trabao.

Esey ta nifica cu huez ta haya cu e empleadonan tin derecho riba continuacion di pago di nan salario, mirando tambe cu e acuerdo ta bisa cu nan lo sigui worde paga te ora cu e opleiding keda cla.

E empleadonan a pidi huez tambe pa Fly Aruba paga un interes tambe riba locual e debe nan y huez a bay di acuerdo cu esaki tambe.

Den su sentencia huez a pone cu Fly Aruba tin cu sigui paga e empleadonan e salarionan palabra, te ora cu nan un manera legal, e acuerdo di trabao worde termina.

Fly Aruba tin cu paga esaki cu e interes cu ta prescribi pa ley.

Como partido perdedor di e caso, Fly Aruba a worde condena na paga costonan di e caso tambe.

FUENTE: http://www.diario.aw