Aruba ta reconoce Gobierno interino di Corsou

ORANJESTAD (AAN): Gobierno di Aruba ta reconoce e Gobierno interino cu den fin di siman a worde huramenta door di Gobernador interino di Corsou. Esaki Prome Minister mr. Mike Eman a declara ayera nochi. El a subraya cu Gobierno di Aruba ta para tras di pueblo di Corsou y e reto grandi cu e pais aki ta pasando aden.
Relaciona cu tur e problemanan politico cu a surgi na Corsou cu a yega asina leu cu Gobernador interino a huramenta un Gobierno temporal, te eleccion di otro luna, e partnernan den Reino – Hulanda, Aruba y Sint Maarten, a saca un declaracion conhunto.

Durante diasabra y diadomingo e prome ministernan di e tres partnernan aki den Reino tabata den contacto continuo cu otro y asina a saca un declaracion conhunto cu a worde firma pa Prome Minister señora Wescot di Sint Maarten, Prome Minister Eman di Aruba y Minister encarga cu Asuntonan di Reino señora Spies. Den esaki a subraya e solidaridad cu tin pa cu e pueblo di Corsou.

“Un asunto asina naturalmente ta algo di e politica y sistema constitucional interno di Corsou, pero nos ta partner den Reino y ora cu tin retonan grandi pa nos sistema democratico den cualkier di e paisnan den Reino, ta na su luga pa nos ta solidario pa cu otro,” Eman a bisa. Pa loke ta e desaroyonan di diasabra, el a bisa, ta enceera un reto grandi pa pais Corsou, pesey Aruba, Hulanda y Sint Maarten tabata kier pa e pueblo di Corsou sa cu “nos ta sigui esaki di cerca y nos ta hopi solidario cu e proceso dificil cu Corsou ta pasa aden y nos tin tur confianza cu, mirando e caminda escogi door di Gobernador cu a yega na un Gobierno interino, cu esaki por guia e proceso pa eleccionnan liber … y escoge un Gobierno cu nos por sigui traha cune,” Eman a comenta. Y ta esaki tambe a keda expresa den e declaracion conhunto cu a worde manda pa Gobierno interino di Corsou.

Na mesun momento Prome Minister Eman den e declaracion duna ta bisa cu nan ta reconoce e legalidad di e Gobierno interino huramenta. El a bisa tambe cu Aruba ta duna hopi balor na e sistema constitucional cu tin, caminda Gobernador ta hunga un rol importante. Apesar di ta para un tiki leu di e situacion, no ta duda cu e decision tuma door di Gobernador Goedgedrag of su reemplasante señora Vrede a haci esaki basa riba evaluacionnan corecto cu ta mustra cu tin un mayoria den Parlamento cu ta sostene un Gobierno interino pa pais Corsou.

Eman a bisa cu tin discusionnan cu ta bay den mas detaye riba e proces, pero no ta na su luga pa Aruba drenta den esaki, pasobra lo no hacie ora cu tin un situacion asina den otro partinan di Reino. Simplemente ta sostene e proceso cu e Gobernador a cana prome cu el a tuma un decision. Pesey Aruba, Hulanda y Sint Maarten ta mira esaki como un Gobierno legitimo y lo traha cune na bienestar di Reino y Corsou.

E ta spera cu Corsou lo por sali di e impasse aki y a manda palabranan di solidaridad na tur e partidonan envolvi, ya cu e ta un situacion dificil pa tur envolvi.” E ta un situacion di reto y dificil, e ta un bon oportunidad pasobra retonan ta duna chens pa profundisa democracia y lague sali mas fuerte.”

FUENTE: http://www.diario.aw