Na Rio+20 Prome Minister Mike Eman y e fundado di Carbon War Room (CWR, Sir Richard Branson a anuncia un cooperacion entre Aruba y CWR den e obhetivo pa haci Aruba totalmente basa riba energia alternativa pa 2020.
E meta aki a haya un acogida di United Nations cu na e conferencia di RIO+20 a puntra Prome Minister Mike Eman y Sir Richard Branson pa incorpora 10 isla mas den e trayecto aki. Na Green Conference Aruba 2012 e prome paso pa cu esaki a wordo haci cu presencia di 21 isla cu a bin comparti e experiencia y vision di Aruba. Dianan 13 y 14 di september ultimo, 200 ehecutivo, inversionista, empresario y otro lidernan di sectornan publico y priva a reuni na Berlin, Alemania pa atende e evento ‘Creating Climate Wealth’.
Na e ocasion ey, Aruba tabata ehempel y topico di discusion. Esaki a keda confirma y relata dor di Dr. Jose Maria Figueres durante su bishita siman pasa pa Green Aruba 2012. “Ora nos a presenta loke Aruba ta haciendo den e actividad aki y tabatin hopi interes di un cantidad grandi di empresa pa participa den e experiencia aki.”
E evento organisa dor di Carbon War Room cu sosten di empresanan mundial manera AT&T y Volkswagen, a conta cu participacion di eruditanan manera Peter Boyd y Markus Beckmann, ta un serie di conferencia exclusivo caminda empresario y innovadornan ta identifica oportunidadnan pa aumenta e fluho di capital pa tecnologianan di un emision abou di carbon. “E actividadnan aki nos ta celebra pa trece un conhunto di persona y organisacionnan y di empresanan cu ta trahando den e espacio aki pa reinventa tur cos riba un modelo cu ta emiti hopi menos carbon,” asina dr. Figueres a splica.
E personanan mas clave y determinante den e cambionan cu ta tumando luga den direccion di un desaroyo mas sostenibel pa e economia y pa e planeta, ta siguiendo di cerca loke Aruba como pais, como entidad y como sociedad, ta haciendo. E iniciativanan cu ya ta andando, e acuerdo y proyectonan cu a caba di cuminsa y e vision cu Gabinete Eman a pone su dilanti pa ehecuta, ta uno sin igual y pesey tin un boluntad grandi rond mundo pa forma parti di dje y wak su resultadonan.
“Berdad ta cu mundo kier wak ehempelnan di con nos por transita den e direccion aki. E hecho cu na Aruba Gobierno a tuma un decision asina importante di inverti den e esfuerso aki, di apoy’e y di lidera e transformacion aki, ta algo cu hopi empresa na mundo lo gusta pa por participa, siña tambe di e experiencia ey y por hiba loke nan a siña pa otro paisnan,” tabata e palabranan di e President di Carbon War Room, dr. Figueres durante un entrevista.
Pa Prome Minister Mike Eman e hecho aki ta nifica cu hunto cu TNO cu CWR e trayecto pa un Aruba sostenibel ta conta cu un socio di clase mundial. “Algo cu nos por ta hopi orguyoso di dje,” Prome Minister Mike Eman ta enfatisa.
FUENTE: http://www.diario.aw
