Despues di su carera politico Balkenende a bira un profesor na Erasmus Universiteit na Rotterdam y ta tambe partner di e empresa di accountancy y centro di conocimento prestigioso Ernst & Young.
Ta den e cuadro aki e tabata na Aruba ya cu e reportahe extenso cu a wordo haci riba e posibilidadnan pa desaroya Aruba den un hub entre Latino America y Europa, a keda cla.
E estudio aki a wordo haci en conexion cu e Conferencia “Europe meets the Americas” cu ta tuma luga na luna di mei benidero.
Balkenende ta haya fantastico di ta na Aruba atrobe y pa sinti e ambiente. “Ora mi papia di sinti e ambiente, mi ta referi na e dinamismo cu mi sinti aki. Tur caminda tin construccion andando, e tram a cuminsa core y e infrastructura ta wordo mehora. Ta sosode hopi”.
Balkenende ta considera e conferencia ‘Europe meets the Americas’ como punto di salida pa desaroyonan nobo. ,,Awor aki ta un poco dificil pa concretisa kico tur ta bay sali afo di e conferencia aki.
E ta duna empresanan Europeo e oportunidad pa den un solo bes conoce partnernan di un cantidad grandi di otro pais. Aruba mester ta hopi cla den e balor adicional cu e isla tin como gateway pa asina empresanan ta haya gana di haci uzo di e posibilidad aki”.
E esencia ta cu un isla manera Aruba kier hunga un rol den mundo. “No solamente pa loke ta e propio actividadnan, pero hustamente manifestando su mes internacionalmente. Mi kier duna Prome Minister Eman un compliment. El a percura cu Aruba ta wordo mira como un isla cu por atribui grandemente na un tema manera durabilidad”.
Balkenende a splica cu su trabou na Ernst & Young ta mas tanto pa ocupa su mes cu e relacion empresarial y durabilidad. “Mundialmente nos ta mira cu sostenibilidad ta halto riba agenda. Con nos ta anda cu fuentenan natural? Con nos ta anda cu energia? Con nos ta anda cu nos sociedad ‘community engagement’? Tur e elementonan aki ta pertenece na sostenibilidad”.
E concepto di Aruba como un isla sostenibel ta un bunita punto di referencia di loke hopi ta spera di dje, asina Balkenende a bisa. “Aruba a tuma e liderazgo aki den scoge un perfil di durabilidad”. Balkenende a bisa cu el a bisa Eman cu tur cos mester wordo bon poni den otro pa tur hende sa ‘de que se trata’. “
Esaki a conduci na e estudio y investigacion cu a wordo haci dor di Ernst & Young. Como partner mi ta tambe responsabel pa e investigacion cu a wordo haci pa un partner di nos sr. Vernon Huerta y sra. Caroline Rodenburg”.
E investigacion a enfoca grandemente riba e desaroyonan importante den e continente Latino Americano. Wak kico ta e desaroyonan mas esencial den paisnan manera Brazil. Desaroyonan cu eynan ta hunga un rol grandi. Kico ta e disputanan na Hulanda. Den tur esaki a wak con Aruba pos distingui su mes. “Kico Aruba por haci pa enforsa su perfil den e region aki pa asina e funcion di gateway, e asina yama ‘green gateway’ ta bin riba un plano mas halto.
Un green gateway ta bisa algo di e perfil berde di Aruba y ta bisa tambe cua ta e actividadnan den cua Aruba ta sobresali”.
| FUENTE: http://www.diario.aw |
