Aruba a wordo honra cu e bishita di Prome Minister di e Takenkabinet na Curacao, señor Daniel Hodge, kende a encabeza e delegacion.
Den entrevista cu Matutino DIARIO, señor Hodge a expresa cu nan a wordo ricibi na un manera hopi caluroso, y nan a pasa masha dushi riba Dialuna, nos fecha nacional.
El a agrega cu Diamars nan tabata tin reunionnan mas formal, entre otro cerca Gobernador señor Fredys Refunjol, y seguidamente e lo a dirigi na un reunion cu Prome Minister mr. Mike Eman, y cu drs. Paul Croes, Presidente di Parlamento.
Encuanto e reunion cu Gobernador sr. Refunjol, señor Hodge a menciona cu esaki a bay hopi bon, den un ambiente positivo cu ta pas cu locual gobierno di Curacao ta bezig na e momentonan aki, cu ta estrecha e lazonan den Reino Hulandes.
El a subraya cu gobierno di Curacao kier drecha su relacion no solamente cu Hulanda, pero tambe cu su ruman cu ta Aruba. “Den pasado tabata tin cierto tensionnan entre e gobiernonan, pero nos no kier sigui den e direccion ey”, prome minister Hodge a expresa.
Den a cuadro aki a hiba combersacion cu Gobernador y cu diferente persona aki na Aruba, pues e ta un bishita di Cortesia unda cu su persona y Gobernador a conoce otro, pero alavez a intercambia diferente informacion.
“E tabata un bon oportunidad cu nos por a splike kico nos ta bezig cune na Curacao, ki pasonan nos ta tumando pa restaura e situacion pa e cosnan cana mehor na Curacao, pero tambe den nos relacion cu Aruba”, e dignatario a expresa.
El a remarca cu e kiermen cu esaki e relacion entre gobiernonan y politiconan, pasobra e relacion entre ambos pueblo ta tremendo, y e por a experiencia esaki durante e celebracion di Himno y Bandera.
Señor Hodge a menciona cu e tarea di su gobierno tin hopi enfoke riba aspectonan interno, pasobra tin hopi asunto cu mester pone na ordo. Un di e puntonan primordial ta finanzanan, cu nan ta, y lo tin cu sigui, dedica hopi tempo na dje.
Tocante e aspecto aki nan a papia cu Gobernador pasobra e tabata interesa pa sa con nan ta manehando e punto aki na Curacao.
Premier Hodge a expresa cu no ta facil pa tuma un palo cu ta troci y hacie recht back y esaki ta sosode ora cu e aspecto financiero no ta na ordo, y esaki ta sosode na henter mundo.
Na e momento aki e enfoke ta hopi interno pero ta sobra espacio pa nan por papia hunto cu partnernan di Reino y wak con conhuntamente por yega na cierto entendimento, cu por beneficia nan tur.
Pa mitad di aña nan tin planea un conferencia di Reino. Durante e bishita na Aruba no tabata tin chens di papia extensamente riba esaki, pero esaki ta algo den ambiente di Reino Hulandes, unda e partnernan ta hunto y nan por traha uni pa yuda otro.
El a acentua cu den e Takenkabinet tin un acuerdo di gobernacion entre diferente partido politico, den cual tin cierto prioridadnan poni den dje. Nan mester garantiza cu e puntonan aki wordo trata pasobra nan ta di sumo importancia, pero esey no ta nifica cu otro aspectonan cu ta importante pa nan como pais, nan no ta traha riba nan. Berdad ta cu e ta un periodo di seis luna,y tin hopi pregunta y cuestionamento si e ta keda pa seis luna so of e ta worde extende, pero te ainda no tin ningun posicion tuma riba esey. En todo caso, punto di salida ta cu nan lo tey te fin di Juni pa cuminzamento di Juli venidero.
| FUENTE: http://www.diario.aw |
