El a expresa cu esaki ta mescos cu ora tin tension entre mama cu tata, cu henter e ambiente den e cas ta daña.
Siman pasa señor Hodge a bay Hulanda pa ser conoci cu e gobierno aya, y e tabata tin bon combersacion y habri cu varios mandatario di e gobierno Hulandes y esaki ta e base cu nan ta poniendo pa drecha e relacion entre Curacao y Hulanda.
E speranza ta cu despues di e periodo di seis luna di e Takenkabinet por sigui encamina e proceso riba e caminda aki. El a reitera cu entre e cuater partidonan di cual e gobierno transitorio aki ta consisti, tin un acuerdo di gobernacion.
“Den e acuerdo aki tin un enfoke pa trece back paz y trankilidad den e comunidad di Curacao, pero naturalmente tambe prosperidad den nos hendenan”, Premier Hodge a subraya.
El a agrega cu e acuerdo di gobernacion aki no ta pa seis luna so, pero pa un periodo di cuater aña.
“Pues, ken cu bini despues di e periodo di Takenkabinet, lo tin cu sigui tog cu e acuerdo di gobernacion manera cu e ta aworaki, pa nos sigui logra e metanan cu tin den e acuerdo aki”, señor Hodge a indica.
Manera ta conoci e Takenkabinet no ta forma pa politiconan, pero si pa profesionalnan den diferente ramo.
Señor Hodge a indica cu trahando como profesional den bedrijf tambe e tin di haber cu politico caba, kiermen nan tin un “feeling” con e ambiente den politica ta. Pero naturalmente, como gobernante, nan ta mira esaki di mas cerca, den Parlamento, den procesonan cu ta tuma lugar, y cu den politica tin hopi cos bunita y bon, pero tambe hopi wega politico cu tambe ta wordo hunga.
El a comenta cu e tin un acuerdo cu su doño di trabao, ya cu su funcion anterior ta director di banco cu ta un trabao hopi dushi, y e no ta kita cu e por bira politico un dia, pero ora e caba e periodo aki e lo bolbe na su trabao na banco.
| FUENTE: http://www.diario.aw |
