E ganador di e sorteo aki lo ta un feliz ganador (a) di entre otro un estadia di 7 anochi pa dos persona cu tur cos inclui na Divi Aruba, 2 pasashi ida a buelta pa Aruba y mucho mas ofreci pa Divi Aruba.
Loke cu ta hasi e sorteo aki mas atractivo ta cu e ganador (a) ta biaha pa Aruba pa Aruba In Style cu Project Runway designer Layana Aguilar, cu ta decendiente di Brazil, y atende e fashionweek aki lusando vestuario di Layana.
Ademas e ganador (a) ta ricibi un diseño di Layana pa bai cas cu ne y un total di $2,500 pa shop na Aruba hunto cu Layana, na cualkier tienda cu e ganador (a) ta desea.
Esaki ta algo claramente un experencia inolvidabel mirando cu Layana ta un diseñadora famoso na Merca y cu sa tur cos di moda actual. Esaki lo trece hopi cobertura pa Aruba mirando cu e canalnan di social media manera entre otro Facebook, Twitter, y Instagram lo wordo usa. Layana a presenta aña pasa na Mercedes-Benz Fashionweek na New York y aña aki na Aruba In Style. Sigur algo hopi positivo pa e mundo di fashion na Aruba.
Project Runway ta un serie di realidad na television Mericano na e canal Lifetime cu ta enfoca riba diseño di moda y ta wordo presenta pa supermodel Heidi Klum. E participantenan ta competi cu otro door di crea nan mesun diseño den un tempo cortico y cu poco material y opcion di tema. Nan diseño ta wordo huzga pa un grupo di hurado famoso y tur siman un diseñador (a) ta wordo elimina.
Project Runway tin un grupo masha grandi di siguido pues e hecho cu un di e diseñadora di nan ta bin Aruba lo hasi cu e lo yama hopi interes di prensa internacional.
Hunto cu asociacion IMG Fashion NY y Aruba Tourism Authority, ARUBA IN STYLE 2013 lo start sali diabierna 8 di november. Un fin di siman cu shownan di diseñador internacional y local, celebridadnan, cocktail parties cu lo wordo presencia pa entre otro prensa internacional y local.
E enfoke di AIS pa e aña aki ta Latino America mirando cu esaki ta un mercado cu a crece hopi den ultimo añanan caminda cu ta purba di atrae un mercado di calidad cu tin e potencial di compra asina aki invertiendo den nos economia. Pa mas informacion di AIS 2013 por bishita www.arubainstyle.com of www.facebook.com/arubainstyle.
| FUENTE: http://www.diario.aw |
