Djey a bin e establecimento di Imigracion y Duana Americano, cu a caba di facilita nos ingreso pa Merca, y e viahanan di e Americanonan cu ta bishita nos cu tanto frecuencia. Pero, ultimamente, desde cu e homber di e pajarito a cuminza goberna Venezuela, y a causa di paso un exodo di gruponan grandi di hende di su pais pa Aruba y pa Merca, factornan a cuminza incidi riba nos relacionnan cu American Airlines cu no ta nada di gaba. Djey a bin e impase cune den e asunto di General Caravajal, y kico el a haci? Manda para tur e vuelonan di y pa Aruba, Corsow y Bonaire, un bunita gesto di “hermandad”!
Pa bolbe na American Airlines, Antes bo por a haci reservacionnan pa bay Merca o bin di aya sin problema, pasobra e cuponan di avion tabata disponible pa e doñonan legitimo di e isla, cu tarifanan razonable, pero ultimamente pa logra un cupo pa bay o bin ta resulta un calvario hopi costoso. Si tin disponbilidad mes, e prijs a yega cerca di cielo, casi impagable pa un vuelo asina cortico. Kico a pasa den e interim, e oleada di venezolanonan cu a descubri e ruta Aruba-Merca sin haci imigracion na Merca sino na Aruba mes, a cuminza blok tur e asientonan disponible cu lunanan di anticipacion, y e Arubiano mes dificilmente por logra un que otro asiento pa bay o bin di su destinacion faborito. Y e turistanan Americano ta busca otro destinacion den nos vecindario cu ta mas razonable den prijs. Nos a yega na un punto cu mester bin un intervencion di Gobierno pa endereza e situacion aki sin causa perhucio na ningun di e e viaheronan.
Hasta studiantenan cu mester sigui nan cursonan na Merca ta hayando nan mes pega, casi sin e posibilidad di logra un asiento pa yega na tempo na nan Universidadnan di estudio. E situacion a bira complica y mi no a mira ningun mandatario lanta un solo dede pa ofrece sikiera mira den e asunto y purba haya un solucion cu ta faborece nos cu ta e doñonan legitmo di e isla, mescos cu e resto di e viaheronan.
Aki, pa custumbra nos no ta papia spaño, nos ta mas pega na Ingles cu na dje y si nos kier keda real mes, ta Hulandes ta nos idioma oficial y esun cu no sa papie no tin nada di haci riba nos isla. Si acaso Hulandes resulta mucho dificil pa nan, anto papia nos idioma vernaculo, o sea Papiamento, cu ta nos di dos idioma oficial y cu tin poco regla grammatical y ta sumamente facil pa siña papia y skirbi. Pero, obliga nos papia otro idioma riba nos propio isla ta parcemi un imposicion irazonable. Na e otro paisnan cu mi conoce di cono sur, o bo ta papia nan idioma, o laga cay, pasobra e oportunidadnan di trabao ta practicamente inexistente.
Nos mester cuida nos mes, nos isla y nos pueblo. Nos no por lague den man di otronan pasobra nan no ta bay haci nada pa nos. Y pa depende di Gobierno pa bin cu solucionnan practico na tempo no ta cos di confia. Esaki no ta un cuestion cu por warda hopi tempo pa un solucion. Of ta convence e aerolinea pa e bin cu avionnan mas grandi, cu mas cupo, of ta pasa un par di Ley o reglamento den Parlamento pa limita e cantidad di cuponan disponible na e stranheronan cu kier bin probecha di nos situacion ventahoso.
E asunto aki no tin nada di haber cu odio, rencor o rechazo pa stranhero pasobra semper nan ta bon bini, pero e tin di haber si cu e proteccion di loke ta di nos y mester keda di nos. Personalmente mi no tin nada contra stranhero di ningun parti, y mi a yega di demostra esey den mil y un ocasion pero e tin di haber si cu e proteccion di loke ta di nos. No por ta asina cu nos mester para na rij, warda otronan pasa nos dilanti pa djey mira si nos ta haya un oportunidad pa viaha na un prijs razonable. Mi ta haya cu ta tempo pa Gobierno bin cu un solucion cu no ta perhudica e Americano of e Venezolano, pero si ta duna su husto lugar na e Arubiano sin perhudica ningun otro hendel Esey por logra den deliberacion cu e aerolineanan cu ta sirbi nos isla, y te awor a sirbie bon.
| FUENTE: http://www.diario.aw |
