E silencio di Banco Central ta percurando pa hopi speculacion riba kico lo sosode cu e aseguradonan, kico lo sosode cu empleadonan di e companianan di seguro envolvi y di e otro companianan, manera ta di Road Service cu e compania di seguro a lanta ultimamente. Tur tin di haber cu e acusacion di a malversa 7 miyon Florin for di un compania di seguro na Hulanda, pa por a lanta e compania New Treston na Aruba.
For di Hulanda a cuminsa un investigacion penal y un investigacion di De Nederlandse Bank pa mal maneho den e compania di seguro HDI Gerling (Hanover), for di unda ehecutivonan a malversa mas di 25 miyon euro y cu e placa ey entre otro a lanta e compania di seguro New Treston na Aruba, Corsou, Boneiro y St. Maarten. Hopi hende ta puntrando nan mes con por ta posibel cu esey a sosode asina facil bou e wowonan streng di De Nederlandsche Bank di Hulanda y Banco Central di Aruba. Un hende a puntra nan mes di unda e placa a bin pa crea un compania di seguro di un dia pa otro?
Pero mientras cu e investigacion mes ta andando, aseguradonan a lesa den corant cu Boogaard Asurantien a dicidi di stop su relacion cu New Treston y ta traspasa tur e seguronan awor pa Guardian Holding, cu ta e compania nobo cu a tuma Fatum over. Esaki ta causando hopi pregunta bou di e aseguradonan, pasobra con por ta posibel cu ta cambia nan seguro sin puntra nan mes.
Di acuerdo cu leynan vigente di Banco Central cu ta controla companianan di seguro, ta para den articulo 22 cu e asegurado mester duna aprobacion por escrito pa por traspasa su seguro di un compania pa un otro. Tambe ta para cu Banco Central di Aruba mester duna aprobacion prome. Aki atrobe e rol di supervision ta bin padilanti, puntrando con ta permiti un ke otro sosode siendo cu na Hulanda tin un investigacion penal di malversacion, esta cu na Aruba a crea un compania di seguro cu placa horta na Hulanda.
Y awor Banco Central mes lo tin cu coopera pa e broker pasa e aseguradonan di un compania pa otro, pa stroba e compania di Hulanda pa logra recobra su placa horta back. E compania di seguro cu ta tumando e polisanan awor, tambe ta haye den un situacion peculiar, na unda e ta tuma algo cu e sa ta contamina y cu lo por tin consecuencia penal, debi na investigacionnan andando. Den comparacion por duna como ehempel cu ta cumprando un auto di cual e cumprado sa cu e auto ta horta, pues cu tardi of trempan, problema lo bati na porta!
Na final di cuenta, e asegurado mester ta sigur cu cobertura pa e prima cu el a paga ta garantisa, na momento cu e bati na porta di seguro y esey Banco Central mester garantisa e aseguradonan. Di otro banda, Banco Central tin un poder ilimita cu ta duna nan espacio pa controla, pa investiga y hasta sanciona, pero tin un asina yama “vrijwaring” cu ta haci imposibel pa persigui nan of pone Banco Central para responsabel pa cualkier di su actonan of decisionnan robes cu nan por tuma.
| FUENTE: http://www.diario.aw |
