Un decision importante cu Conseho di Minister a tuma diamars mainta, a autorisa Minister di Energia y Economia sr Mike de Meza, pa habri deliberacionnan cu Valero riba redestinacion di e area di refineria pa por bay tin desaroyonan nobo riba e terenonan aki.
Ya caba Valero den diferente ocasion a haci oferta pa transferi na Gobierno cierto di e propiedadnan cu ta di hopi balor manera esun di parti di fuel y esun di transshipment, cu lo ta importante den e deliberacionnan riba redestinacion di e areanan di e refineria.
“E facilidadnan aki si Gobierno Sali di bon den e negociacionnan, lo nifica cu Gobierno lo haya algun assett di hopi balor den aña 2015 y decision di Conseho di Minister a tuma ta cu tur e balornan cu e assettnan aki tin cu Gobierno lo termina cune cu e speransa cu e negociacionnan lo bay den bon rumbo, tur esaki lo bay na beneficio di e investment fund pa asina e por tin un peso adicional, fuera di e financial tranfer tax cu tambe lo bay den e investment fund, pasobra e investment fund lo paga pa e proyectonan di PPP y SOGA pero na mes momento pa continua cu e trabounan cu FDA tabata haci, pasobra e incorporacion di FDA ta yega su fin e aña aki, y AIB a pidi pa busca un formula pa continua cune, y esaki ta e formula cu nos ta mira pa continua cune. Lo tin fondo pa paga pa e proyectonan di SOGA y PPP y na mes momento lo tin tambe e ora ey e capital necesario pa sigui cu inversionnan den bario, den renobacion di centro di ciudad, den scolnan, cu ta hopi importante pa futuro di Aruba.
Pa loke ta acuerdo of palabracionnan cu tin cu Valero, Minister Presidente Mike Eman a mustra cu e acuerdo cu tin cu Valero, ta cu lo bay drenta den negociacion na e momentonan aki, y e decision cu Conseho di Minister a tuma pa delega e Minister di Energia, ta pa forma un grupo di trabou y pa cuminsa di biaha cu negociacionnan pa por yega na redestina e area pa cosnan constructivo y positivo cu mester tuma luga riba e areanan aki. “Na mes momento tambe, e assettnan grandi cu tin, cu Gobierno posiblemente lo por ta beneficiario di e assettnan aki, cu nos logicamente lo por lease of Gobierno por bende esakinan, y e fondo di esaki lo wordo destina pa e investment fund. Nos ta mira 2015 como un aña hopi hopi positivo, cu hopi inversion, cu hopi stabilidad den finansa publico, cu tabata motibo pa hopi discusion na Aruba y den Reino pero na mes momento discusionnan cu ta conduci tog na decisionnan importante.
Parti di e decisionnan cu Conseho di Minister a tuma, lo ta forma parti di e dialogo social y manera tur decision importante, nos lo hiba esakinan na dialogo social, nos lo presenta e ideanan y lo discuti esaki cu partnernan.
Asina nos a haci semper cu tur cambio importante y esakinan tambe nos lo haci. Gobierno en todo caso a mira unda tin e decisionnan importante pa wordo tuma y e decisionnan a wordo formula y consehonan ta wordo busca den corto tempo awo pa asina por bay dialogo tambe y den 2015 nos por ta ehecutando caba parti importante di e decisionnan cu nos a tuma den Conseho di Minister pa locual ta 2015 pero caminda nos por anticipa tambe riba 2016 y 2017. Un fiscal counsil cu ta bay percura pa presupuestonan den futuro tambe cumpli cu normanan internacional y esaki ta trece un stabilidad importante pa futuro di pais Aruba.
Nos ta keda naturalmente semper den e debate internacional, nos ta kere cu finansa publico no ta algo los di su mes, pero ta parti di un vision social economico, e ta parti di un maneho caminda bo tin cu cuida di esunnan di menos recurso, bo tin cu inverti den futuro, den enseñansa, den bo hobennan y semper buscando e balansa entre un finansa publico sostenibel pero na mes momento e finansa publico sostenibel sostene e desaroyo social economico,” Minister Presidente Mike Eman a declara durante entrevista despues di conseho di minister.
| FUENTE: http://www.diario.aw |
