E abogado a den un comunicado a bisa cu no tabata tin ningun motibo pa hinca un operacion asina den otro y nan a bisa di lamenta cu Merca lo a bin cu un operacion undercover di varios miyon dollar na Aruba, di cual Bouterse sin un motibo bon of huridico a wordo envolvi y a bira victima.
“Ta remarcable cu e oficina di DEA cu tin na Suriname no a wak un motibo pa investiga e accionnan di Bouterse, pero e oficina na Aruba, un pais dentro di Reino Hulandes si a wak e oportunidad di hinca un operacion den otro, basa riba ponemento di un trampa”, segun e declaracion di e abogadonan di Bouterse.
Di un banda e abogadonan a bisa locual nan a bisa, pero Diabierna pasa Bouterse den un corte na Manhattan a admiti cu el a yuda den un transporte di mas di 5 kilo di cocaina, cu tabata tin e destinacion final di Merca.
El a admiti tambe cu e tabata tin posesion di arma di candela ora cu e tabata organizando e operacion di traficacion di droga.
Banda di esaki Bouterse a admiti di a pone un paspoort falso na disposicion di un persona cu segun e, tin lazonan cu e organizacion terorista Hezbollah.
Den e acusacion original a acusa Bouterse di posesion di un lanzador di cohete, pero esey a wordo cambia pa posesion di arma di candela.
Huez den e caso ainda tin cu tuma un decision si Bouterse por wordo acusa tambe di yuda un organizacion terorista.
Bouterse por haya un castigo di 15 aña bay ariba, pero si wordo comproba cu el a yuda un organizacion terorista esaki por bira 30 aña te bida largo.
| FUENTE: http://www.diario.aw |
