Den pasado el a traha den camara room y awor ta traha riba field. Sa mire tambe trahando unda ta controla pasaheronan cu ta pasa e control di seguridad despues di imigracion. Pa basta tempo tin ladronicia tumando lugar na aeropuerto.
Den diferente aerolinea nan oficina tin placa ta disparce. Na mas cu un ocasion e sospecho tabata bay riba e trahadornan mes di e aerolineanan. Te hasta tin trahador femenino cu a wordo kita for di trabou pasobra a kere cu ta nan ta horta placa. Entre otro na West Jet tin placa cu a somenta.
Te awe ainda tin grupo di trahador cu ta pagando tur luna a consecuencia di placa cu nan ta responsabel y cu a cay short. Awor porfin e ladron a wordo gara. Ta resulta cu ta e mesun trahador di seguridad di aeropuerto ta esun cu tabata horta. E tin master key di tur porta entre otro di aerolineanan.
E tabata drenta mainta trempan ora cu tur cos ta keto y haci manera ta control e ta hiba. E tabata pasa wak kico a wordo laga atras di balor. Despues cu keto bay cosnan straño ta pasando, a bay over na instala camara den areanan menos spera. Camaranan scondi a conduci na haya sa ken e ladron realmente ta.
Awor cu varios hende a perde trabou inocentemente, a resulta cu ta un trahador di seguridad na aeropuerto mes ta esun cu tabata hortando. Pesey mes nunca a biba pensa cu un hende cu mester garantiza seguridad ta cometiendo algo asina.
Awor su number a hunga. E trahador aki cu su 18 aña di servicio lo tin un salario di alrededor di 5000 florin of mas pa luna. Awor el a perde tur cos. Kizas e lo purba bringa su añanan di servicio pero esaki sigur lo no bay facil. Na prome instante el a nenga pero awor cu tin prueba graba no tin escapatorio y parce cu el a admiti.
Ta calcula cu den e trayectoria di hortamento tin sigur un suma total di 10 mil dollar horta. El a keda deteni na aeropuerto pa esnan di grens bewaking y a wordo interoga pa autoridad. Parce ya caba el a wordo laga liber pero su trabou sigur e lo no haya mas. Ademas pa semper su imagen a wordo daña. Pa colmo tin basta reclamo riba e trahador aki.
E lo ta fia placa y dal hende cara abou tambe den e area di aeropuerto. Hende cu ta haci negoshi paden y pafor di aeropuerto a bira victima di e homber aki. Aeropuerto mes no kier duna ningun informacion pasobra nan no ta papia riba asuntonan interno di personal.
| FUENTE: http://www.diario.aw |
