E por a compronde for di Prome Minister, cu el a reuni caba cu Valero, pa e re-destinacion di e areanan di e refineria.
E parlamentario por a mira riba internet cu e compania a pone varios di su unidadnan na benta, abiertamente.
PDR a saca na conclusion cu gobierno, riba su mes y sin cu ni un dia a bin Parlamento pa anuncia esaki y conoce e sentimentonan di Staten riba e tema aki, a dicidi pa bay di acuerdo cu e desmantelacion, asina sin mas, sin un mocion ni nada.
Parlamentario mr. Bikker a menciona cu e ta haya esaki hopi condenable pasobra e refineria tabata representa pa Aruba e 12% di su producto nacional bruto(DGP) y miles di hende tabata traha eyden ganando un average di salario hopi halto.
PDR ta protesta energicamente contra e decision aki, mr. Bikker a enfatiza. Esaki pasobra bao e comision di energia cu e mes ta presidi, via Parlamento a purba pa haya alomenos un reunion cu e minister concerni, pa bin splica netamente tocante e plannan di e refineria. E reunion aki a wordo pidi for di November aña pasa y te dia di awe no a haye.
Parlamentario mr. Bikker a indica cu tabata tin otro reunion publico na aña 2012, unda cu Valero a haci cierto anuncio y e reunion a bay for di man, y te dia di awe e reunion aki no a sigui.
Parlamentario Bikker ta haya hopi lamentable cu ta den prensa, como Staten y como fraccion, a tuma nota cu gobierno riba su mes, sin consulta ni aprobacion di Parlamento a bay di acuerdo cu Valero pa desmantela e refineria.
El a remarca cu mas pronto posible mester bin un reunion riba e asunto aki, como tambe un mocion pa para e desaroyo aki, pasobra gobierno a haci comosifuera a haci tur esfuerzo pa reapertura di e refineria pero ni un dia a mira un aviso den corant unda cu gobierno ta invita partnernan interesa pa tuma contacto cu gobierno, pa esaki intermedia.
El a bolbe declara cu su propio fraccion a trece como cuater candidato pero nan a wordo bisa cu nan no mester bin cerca gobierno sino bay New York, papia cu e bankeronan di e “dealbook” di Valero.
E parlamentario a subraya cu si gobierno enberdad tabata tin e disposicion e lo actua otro na lugar di haci un show.
PDR ta protesta energicamente, el a reitera, pasobra na Aruba solamente a resta un pilar economico cu ta turismo, cu danki Dios ta bayendo bon, pero nos pais mester keda busca otro pilarnan economico y esun cu tabata mas cerca ta e refineria pero lamentablemente, gobierno a pone su empeño.
| FUENTE: http://www.diario.aw |
