Douane Mericano a intercepta un total di 11.46 “cocaina liquido” na vliegveld di Aruba

Departamento americano di Douane (CBP) cu ta estableci aki na vliegveld di Aruba y ta responsable pa controla cada persona cu ta sali cu destino Merca, a canta bingo na momento cu nan a intercepta un total di 11.46 Liber di “ cocaina liquido” den maleta di un pasahero di nacionalidad Guyanez.
E pasahero di 28 aña di edad a aplica pa un permiso pa drenta Merca riba 28 di Januari. Revisando e aplicacion, a opta pa controla su maleta mas profundo como cu un di e agentenan tabata sospecha cu e persona tabata actua straño. Na momento di controla su maleta, a bin descubri 6 boter lora den paña cu e “cocaina liquido” den dje.

Ora cu a test e liquido, e resultado a sali positivo pa cocaina.

E pasahero cu tabata preparando pa biaha bay Miami, a admiti cu e droga ta di dje. A calcula cu e cocaina tin un balor di $150.000 riba caya.

Director Dylan J. DeFrancisi a splica na prensa cu Islanan di Caribe ta keda un punto di transito pa esnan cu kier transporta droga pa Merca.

Como cu Aruba tin su mesun Pre-Clearance, ta pone cu e control por ta mas severo y por intercepta cualkier persona cu lo ta purba drenta Merca cu cualkier substancia prohibi

FUENTE: http://www.diario.aw