Esaki tabata e factor dominante, cu a yuda hopi hende diripiente mira algo inusual den cielo, na un distancia basta leu pabao di Aruba. Un rabo di candela cu tabata move rapido y hasta dal un birada.
Awor tin indicacion cu loke a ser mira, ta un “Air-to-Air Heat-Seeking Missile”, cu a worde dispara for di un Avion Militar Venezolano, y cu na final a dal contra un Avion chikito cu jet-engine no-identifica.
Por lo menos dos avion di Forza Aereo Venezolano tabata persigui e avioneta aki. Nan tabata sigui su tras desde area di Barquisimeto, y tabata parce cu e ta buscando forma pa huy di espacio aereo Venezolano.
Como cu e capitan di e avion pirata aki no tabata responde na ningun orden, a dicidi na dispara y shoot-down e avioneta aki algun momento prome cu el a bandona espacio aereo Venezolano y drenta esun di Aruba.
Leynan Venezolano ta permiti Forza Aereo haci esaki cu avionnan cu no ta reacciona of ta haciendo narcotrafico.
Esaki ta e prome biaha? DIARIO a ricibi varios reaccion di personanan, cu ta insisti cu Diamars madruga algo prome cu 6’or, a mira algo similar tambe den cielo, na parti Noordwest di Aruba. Esaki lo por ta e di dos avion cu nan ta shoot-down den un siman.
Bon mes cu esun di Diahuebs a socede ora cu ya tin hopi hende riba caya, y resultado di esey ta cu diferente video, y potret a worde saca cu smartphones. Varios turista early birds cu ta lanta trempan y bay beach, a mira tur esaki socede, y asina a cuminza yama Polis pa bati alarma.
ALARMA A SER
BATI TUR CAMINDA
Ainda den scuridad algo pasa di 6:30 hopi local y turista tabata testigo di un obheto ta bula na candela y despues a bin straight abao plama den lama. Polisnan mes a worde notifica y a cuminsa core banda di beachnan di Hotelnan. Cuerpo di Bombero tambe a ser notifica.
Na Beach a topa cu turistanan cu tabata canando trempan na oriya di lama. Nan a confirma na polis cu nan a mira un avion bin abao y dal duro den awa. Poco poco a cuminsa activa e demas departamentonan manera Polis Maritimo, Kustwacht pa subi e lama grandi y bomberonan cu a bin na costa.
No tabata masha cla kico y unda e cos a pasa. Mas y mas e informacion a cuminsa drenta caminda cu Aruba Ports a cuminsa haya informacion di tankeronan y cruseronan cu a cuminsa duna e posicion exacto di unda mas of menos nan tambe a mira e bola di candela y despues algo cay den lama. Asina a pone cu mas facil pa Maritiem Politie y Kustwacht por a yega.
VARIOS HELICOPTER
Y BOTO A BAY
Alarma a ser bati te na Rescue and Coordination Center (RCC) di Guardacosta Hulandes pa Caribe. Mesora a sali e avion Dash-8 patruyero maritimo, tambe e Cougar, y e helicopternan AW-139, como tambe e cutternan Panter y Jaguar, y dos speedboat tipo Super-RHIB. Tambe a haya sosten di tres super speedboat tipo FRISC di Marina Hulandes.
Finalmente despues di un buskeda a cuminsa topa cu cosnan procedente di caida di un avion. A haya cantidad di bulto di droga. Ta papia di entre 100 cu 300 bulto. A haya tambe varios pida humano den lama ta drief, y algun pida metal aki-aya.
Esaki por ta mustrando cu e avion a plama di otro ora di a dal na superficie di lama.
Tur loke por a worde saca di lama a logra pone den boto pa trece tera. Mientrastanto for di Venezuela a drenta informacion mainta trempan cu berdad nan a perde contacto cu un avion cu tabata den e area di Aruba. Ningun rato a menciona cu tabata tin cualkier avion militar su tras.
Via ATC Curacao si cu nan radar, a bisa cu a nota cu tabatin mas cu un avion tras di e Lear-Jet aki. Aunke Venezuela despues a laga sa di tabata tras di e avion cu F-16 a bisa tambe cu desde Barquisimeto tabata su tras. Ora cu el a drenta espacio aereo di Aruba a lage bay of sigui.
SPECULACIONNAN
SIN CONTESTA
Hopi speculacion a cuminsa mesora. Tin indicacion cu a dispara riba e Avion prome cu el a bandona espacio Venezolano y drenta esun di Aruba. Pero tog, con e avion militar por tumba un avioneta den nos espacio aereo? Aunke ta un avion carga cu droga tog esaki ta violacion pa espacio di otro pais door di Venezuela. Ora cu e cos a bira asina serio, semper lo bay over na hibe na nivel diplomatico. Hulanda a cay aden y tambe Gobierno di Aruba.
Fiscal di Ministerio Publico tambe tabata envolvi y Hoofd Officier tabata tuma e decisionnan. For di mainta trempan mandatarionan tambe tabata pendiente pa henter e desaroyo.
Minister Arthur Dowers a reuni cu e departamento di Calamidad cu ta atende tragedianan di avion. Tambe minister Otmar Oduber a atende cu e parti di espacio aereo y riba nivel diplomatico tabata minister Benny Sevinger cu ta e Prome Minister Interino e momentonan aki.
Pa basta ora e buskeda a sigui riba lama. Ora a saca tur e bultonan a logra tambe trece esaki na pier di kustwacht na Savaneta Kamp cu e restonan humano. Parce cu e avioneta nan tin un bista di unda e tabata bin of di unda e ta procedente pero no kier divulga nada ainda.
E departamento di Droga na Merca DEA tambe a worde activa pa e caso aki hunto cu e demas autoridadnan.
| FUENTE: Flor Mizrachi Angel - http://prensa.com |
