(Aruba) MEP ningun momento tabatin of tin cumprado pa refineria Valero

Fraccion di MEP diaranzon mainta durante di su conferencia di prensa tradicional, no por a duna ningun informacion riba e candidatonan cu e partido aki ta bisa cu e tin, pa cumpra refineria Valero y habri esaki di nobo. Al contrario, dado momento Adi Thijsen di fraccion di MEP a bira sumamente irita cu preguntanan di miembronan di prensa y dado momento hasta a bay asina leu na insinua cu sr Bill Day, cu kende e periodista Hilario Donker a combersa riba benta di e refineria, lo a gaña e periodista aki.

Ningun pregunta riba nomber di compania of hendenan cu MEP ta bisa cu e tin pa cumpra e refineria, a ser menciona pa miembronan di fraccion di MEP, kendenan claramente a confirma cu tur e accion cu e partido ta hibando dilanti di e refineria, ta un tipo di comedia politico y nada mas.

Parlamentario Rasmijn hasta a cuestiona e trabou cu prensa a bin ta hibando y hasta a bira chistoso ora cu el a insisti cu ta prensa lo tin cu haci su trabou y trata di haya sa nomber di e companianan aki cu lo kier cumpra e refineria.

Ningun momento Rasmijn tabatin un contesta valido pa duna na miembronan di prensa y solamente a mustra cu e accion di MEP ta un accion sin meta y sin futuro, simplemente buscando un discusion politico mirando cu e partido no tin algun drechi pa presenta na pueblo. Hasta declaracion cu su lider Evelyne Wever Croes a duna na 2011 den Parlamento di Aruba, cu partido MEP lo tin hende pa cumpra e refineria for di Valero pa “su mañan mes” segun Adi Thijsen, tanto Marlon Sneek di AVP como miembronan di prensa, ta compronde robes ya cu e “un dia” aki, no necesariamente ta mara na un solo dia.

Sinembargo mientras tanto e “un dia” di Evelyne y MEP a dura cinco aña caba y ta bolbe confirma cu na 2011 MEP a hunga mesun comedia aki y awor cinco aña despues, MEP kier hunga mesun wega aki, sabiendo cu nan no tin algo pa duna Valero of pueblo di Aruba.

FUENTE: http://www.diario.aw