Minister di Turismo, Transporte y Cultura, Otmar Oduber dialuna den un entrevista a splica cu asina ta haya un bista mas cla di e movecion di turista for di Venezuela cu a bin ta creciendo cu un trend nobo cu ta concidera “no normal”.
Aruba Tourism Authority a haya e instruccion specifico for di e mandatario pa separa e cantidad di turista cu ta keda un dia so pa sigui su siguiente dia pa un otro destinacion for di e cantidad di turista cu ta keda pa mas dia.
Na januari 2015, cifranan a mustra cu e turistanan for di Venezuela for di un crecemento di casi 30%, entre 13 pa 14% ta keda Aruba mas largo cu un dia. Esaki ta e turistanan cu tur hende ta gusta, di calidad, cu ta gasta.
Despues a bin e grupo di turistanan cu ta keda pa un solo dia, pero tambe ta contribui bon na e economia di Aruba, pasobra nan ta paga Passenger Facility Charge, nan ta paga un anochi den hotel, nan ta come y tin cu ta hasta shop ora nan ta riba nos isla pa un dia so. E mandatario a bisa cu por ultimo mester menciona e turistanan cu ta keda mas largo, pero ta bin pa “raspa carchi” of pa cumpra cosnan cu tin scarcedad di dje na Venezuela. El a bisa cu e turistanan aki no ta mucho, kisas 200 pa 300 for di e total di un miyon turista cu Aruba ta ricibi pa aña.
Tocante e remarke cu e turistanan ta cana cu maleta riba caya, e mandatario a contesta cu si wak e turistanan por ehempel Brazilero den mallnan na Miami y Orlando cu ta cumpra masha hopi mes, ta un custumber cu nan ta cana cu un maleta y no ta nada straño pasobra nan ta haci compra.
El a splica, ademas, cu Banco Central mes a raporta un crecemento grandi den e cantidad di placa cu e turista ta laga den nos economia. No por cera wowo, cu tin un grupo cu ta bin raspa carchi, ta bin cumpra papel di wc, remedi y cosnan den supermercado. Nan tey of no, nan ta cumpra, y e placa ta keda den nos economia, Oduber a conclui bisando.
FUENTE: http://www.diario.aw |