E motibo pa e publicacionnan aki tabata principalmente declaracionnan haci pa un supuesto testigo den e caso, Jurriën de Jong.
Señor De Jong a bisa cu e tabata testigo di e desaparicion di Natalee Holloway riba 30 di Mei 2005, y cu e tabata na e sitio y a wak con Joran van der Sloot a dera curpa di Holloway den un espacio cu tabatin den suela bao di e trapi di Spyglass Tower di Marriott Hotel na Aruba.
Den luz di e testimonio di señor De Jong como un supuesto testigo, y di un declarion huramenta cu De Jong a haci na notario, actual Fiscal Mayor di Aruba Eric Olthof a studia e dossier di Holloway.
No obstante cu señor De Jong no a presenta ningun prueba plausible mas di su storia (e testimonio actual ta identico na esun cu el a duna na 2013 na Ministerio Publico), Fiscal Mayor Olthof a comisiona Polis pa contacta management di Marriott (considerando tambe e tipo di caso, e importancia di e caso y e duracion largo di desaparicion di Natalee Holloway) cu e peticion pa duna informacion tocante e situacion na e tereno di construccion di e Spyglass Tower di Marriott riba 30 di Mei 2005.
Otro bisa: kico a wordo construi y kico no a wordo construi riba 30 di Mei 2005, e anochi di desaparicion di Natalee?
Recientemente Ministerio Publico a ricibi e informacion pidi for di management di Marriott na Merca (Orlando, Florida). For di e informacion aki, ta bira cla na un manera indiscutible cu riba 30 di Mei 2005, no a cuminza ainda cu ningun construccion of actividadnan di construccion na e lugar cu señor De Jong ta specificamente apunta como e lugar exacto unda Natalee Holloway lo a wordo scondi y/of dera. Mas concretamente: e fundeshi di e Spyglass Tower (cu mester a wordo lanta ainda esten) y di e trapi di e Spyglass Tower no tabata existi ainda. Esey kier meen cu Natalee Holloway nunca por a wordo scondi y/of dera ey
Esey ta hiba na e conclusion cu e version di señor De Jong tocante loke el a mira e anochi ey, no por ta corecto, y cu su testimonio, considerando loke ta aki menciona, no ta agrega na resolve e caso. Mas investigacion (ki sorto di investigacion cu por ta) bao di e trapi di e Spyglass Tower lo no hiba na haya e restonan di Natalee Holloway.
Si tips y informacionnan, cu ta suficientemente substancial y concreto, surgi den futuro, anto sigur nan lo wordo investiga pa Polis y Ministerio Publico, den speranza pa finalmente hiba e caso na un conclusion y e sospechoso(nan) pa husticia.
Na e momento aki sinembargo, Ministerio Publico y Cuerpo Policial di Aruba lamentablemente no tin ningun tips of informacion nobo den e caso.
FUENTE: http://www.diario.aw |