Den e contexto aki e ta hopi avanza cu e proyecto di lanta un restaurant den e prome avion cu Air Aruba a adkiri, y esaki ta asina bon pensa cu no solamente e ta caba un atraccion pa nos localnan como pa turistanan, sino cu ora e habri como restaurant lo bira unico den Caribe.
“Mi a inverti basta placa, pero el a keda hopi bunita. E ta bay bira un restaurant pero e ta bay bira algo multifuncional”, Dientje a splica nos.
“ Mi a laga 40 stul unda e muchanan por sinta, y mescos cu mi ta bay scolnan pa duna presentacion, e muchanan por bin cerca mi, por nada, pa mi duna nan presentacion den e avion”.
-Algo sigur masha masha leuk- nos a expresa na e dama cu ta masha entusiasma cu esaki.
“Den e parti di cabina ta bay tin “flight simulator” pa e muchanan, pero e ta bay bira algo turistico tambe.
Aworaki e avion ta cla, poni na halto. Den e restaurant aki lo ofrece e mesun tipo di producto cu e pasaheronan tabata haya den e avion, Mi a cumpra tur e uniformnan di e stewardessnan anto asina e clientenan lo wordo sirbi tambe”, Dientje a relata.
Den e parti pabao lo brinda cuminda crioyo y masha dushi di e idea aki ta, cu lo siña e clientenan traha pan bati, cu ta nan mes ta bay come free.
Cu Dios su poder e intencion ta pa inaugural e restaurant na December 2016, den un ambiente festivo y bon ilumina di cual e pueblo lo goza un mundo di dje.
Manera ta conoci e avion ta poni den e mesun cas di Dientje ubica na Santa Cruz, cerca di Botica Central. Dientje a pinta un logo den e avion di su mes creatividad. Bal la pena pa duna e dama aki tur nos apoyo como comunidad, y Matutino DIARIO, for di awor caba, ta desee hopi exito cu e proyecto interesante y tremendo aki.
Hasta a bin na nos mente e pensamento cu bon por ta cu lo tin gruponan di famia, scol of coleganan di trabao cu lo kier celebra nan cena di Pasco y Anja nobo den e ambiente di “Air Aruba” e aña aki.
| FUENTE: http://www.diario.aw |
