Diabierna mainta te den oranan di atardi, Hues di Corte den Promer Instancia a dedica na tratamento di e caso grandi di traficacion di 110 kilo di cocaina caminda cuater Arubiano ta envolvi.Ta trata aki di e hombernnan G.R., K.W., R.Z. y A.C. Fiscal a baha pisa riba e grupo aki y a condena totalmente e traficacion aki cu tin un balor riba caya di mas cu mey miyon Dollar. El a exigi 7 aña di prison pa G.R., K.W. y R.Z. mientras cu pa A.C. el a exigi 5 aña di prison.
IMPORTA DROGA DEN DIA CLA:
Fiscal a acusa e grupo cu 19 Mei 2018 a importa 110 kilo di cocaina y of ta complice di importacion.
Hues a bisa cu e caso a cuminsa 19 Mei 2018 door cu CID a haya informacion y tambe a haya yamada anonimo cu A.C. tin hopi droga na su cas na Casibari y cu el a bin cu e droga riba e beach dilanti di cas di Gobernador.
Ta asina cu anterior e sospechoso R.Z. a desmenti di tin algo di haci cu e caso y a pidi Hues pa laga check camera di seguridad na e restaurant na e beach caminda por mira kico tur a pasa.
110 KILO DI COCAINA CONFISCA:
Polis a bay cu aprobacion di Hues Comisario pa haci investigacion na cas di A.C. na Casibari. A bin haya dos icejug cu 99 paki di cocaina. A confisca un boto di pisca chikito. E 99 pakinan a pisa 110 kilo di cocaina.
Hues a bisa cu for di 20 paki a tuma muestra pa manda laboratorio cu ta confirma cu ta cocaina.
CAMERA DI SEGURIDAD A MIRA TUR COS:
Ta asina cu autoridad a bay mira camera di e restaurant riba beach banda cas di Gobernador y tambe for di un camera di un cas den vecindario. Por a mira cu 6.25 di mainta un pick up a yega cu un trailer di boto.
E pick up ta di R.Z. Banda di 9’or un boto a yega cu 3 hende sinta y a hinca e trailer pa saca e boto. Den e boto a mira dos icejug blanco. E pick up a hiba e boto y tras di e pick up tabatin un Nissan Sentra cora ta core. Investigacion a mustra cu e auto ta di A.C.
Na e restaurant tambe a mira K.W. y G.R. ta cana manera nervioso. Na e beach tambe tabata staciona e auto KIA cu G.R. tabata core. Na Casibari riba un camera a mira con e pick up a yega na e cas y e auto cora ta su tras.
GAÑAMENTO DEN CORTE:
Hues a puntra cu K.W. kico a pasa. El a bisa cu e dia ey e tabatin afspraak cu G.R. pa bay mira e corementonan rond di Aruba. Na caminda pa bay Cuartel Militar Savaneta, G.R. a pidi’e si e por yud’e pa haci un fabor pa saca un trailer pa un hende. Na Bright Bakery, a topa cu R.Z. Segun K.W., G.R. a baha for di auto y cambia cu R.Z. Segun K.W. el a keda sinta den auto y R.Z. a bay sinta den auto cerca dje mientras cu G.R. a bay cu e pick up pa busca e trailer na cas di A.C. Nan a keda warda.
R.Z. den su declaracion den Corte a bisa Hues cu G.R. a yam’e den careda di 5’or di mainta pa presta su pick up. Nan a topa na Bright Bakery y G.R. y K.W. a bay cu su pick up bay busca e trailer di boto na cas di A.C. Ta asina cu R.Z. cu A.C. no ta papia y pesey G.R. a dicidi di bay busca e trailer. Hues a remarca cu aki tin diferencia den declaracion.
K.W. ta bisa un cos y R.Z. ta bisa otro cos.
G.R. a bisa Hues cu ta R.Z. a yam’e pidi pa un trailer di boto pasobra e tin un boto pa bay saca. Door cu R.Z. no ta papia cu A.C., G.R. a bay cu e pick up di R.Z. bay busca e trailer. R.Z. a desmenti esaki categoricamente.
A.C. a bisa Hues cu G.R. a yam’e y bis’e cu e ta fia e trailer di boto. Na cas di A.C. na Casibari tin un tereno grandi y ey riba tin e trailer para. A.C. a desmenti di tabata core su auto cora e dia ey.
El a bisa cu un otro persona tabata cu su auto.
Ta asina cu despues cu a saca e boto for di laman, dos Venezolano a drenta den e pick up hunto cu R.Z. mientras cu e capitan di e boto a bay den e auto cora. Segun R.Z., G.R. a pidi’e pa hiba e boto na Bright Bakery y eynan e ta tum’e over pa hiba na cas di A.C. Sinembargo den e rotonde na Tarabana, G.R. den su auto a duna R.Z. señal pa para y G.R. a bisa K.W. pa bay cu e pick up mientras cu R.Z. ta bay cun’e.
Fiscal a remarca cu K.W. durante interogacion di Polis tabata desmenti cu el a core pick up di R.Z. Ta despues el a bisa cu el a core e pick up cu e boto riba trailer.
K.W. tambe ta worde acusa di tabatin equiponan di DJ horta. K.W. a splica cu na 2016 el a cumpra equiponan di DJ for di un Surnameo pa 2 mil Florin. Na 2017 el a empeña esakinan. Hues a bisa cu e equiponan aki a worde horta na September 2016 for di auto di e doño.
E sospechoso G.R. a desmenti cu el a declara na Polis cu el a mira R.Z. y A.C. riba e beach. El a bisa Hues cu el a bisa Polis cu el a mira e auto di A.C. y e pick up di R.Z. Hues a bisa cu ta sospecha G.R. di negoshi di droga. G.R. a bisa cu e no ta deal den droga. E tin su negoshi. El a remarca cu e por ta droga pasobra e ta usa droga.
Fiscal a remarca cu G.R. ta blo cambia su declaracion. Fiscal a remarca cu G.R. a bisa cu tur locual a lesa den cellular, esey e ta. E ta haya cu G.R. a admiti di sa di e deal. Segun Fiscal for di e mensahenan por saca na cla cu G.R. a bisa cu ta A.C. ta esun cu a busca e droga y cu G.R. lo percura pa bende e droga. A.C. y G.R. tin contacto cu Guarda Costa pa haya sa ki ora tin control. Un tal Angelo cu ta ilegal lo ta encarga pa trece droga y arma.
Na opinion di Fiscal ta Angelo, A.C. y G.R. a prepara e importacion di droga y nan a drecha un boto pa por trece droga Aruba. 30 kilo lo tabata pa G.R. y e resto pa A.C. G.R. a desmenti tur esaki y cu ta Polis ta interpreta cos robez.
EXIGENCIA DI FISCAL:
Fiscal ta haya legalmente proba. 19 Mei 2018 Polis a dal den 110 kilo di cocaina na cas na Casibari. Fiscal ta haya cu G.R. tabata envolvi den organiza e importacion di e 110 kilo di cocaina hunto cu A.C. A.C. a pone un trailer disponibel y tabata core tras di e pick up. El a cumpra dos icejug blanco algun dia promer. Na su cas a haya e lote di droga den dos icejug.
Pa loke ta R.Z. y K.W. e pregunta ta si nan ta envolvi y tabatin intension riba e importacion di droga. No ta asina cu si e sospechoso desmenti esey kiermen cu e intension no tey. Fiscal ta haya cu tanto R.Z. como K.W. ta envolvi. R.Z. a yuda cu su pick up saca e boto for di laman y K.W. a percura pa hiba e boto na cas di A.C.
Tambe Fiscal ta haya K.W. culpable di incubrimento di equiponan electronic di DJ. El a admiti di a cumpra e equiponan pa 2 mil Florin for di un Surnameo y no sa unda e ta biba.
EXIGI CASTIGO:
Fiscal a bisa Hues cu 110 kilo di cocaina no ta wega. Mas cu mey miyon Dollar esaki su balor ta riba caya. Aruba ta worde usa como trampoline pa traficacion di droga. Si mira e cantidad aki, un gran parti lo worde exporta. Droga ta causa un cantidad di criminalidad. Droga ta veneno pa comunidad.
Fiscal a exigi 7 aña di prison pa G.R. y A.C. E ta haya cu nan tin funcion organizatorio. Pa R.Z., Fiscal a mustra cu recien R.Z. a sali liber despues di sinta 4 aña pa transporta droga riba un boto. El a exigi 7 aña tambe pa R.Z. Pa K.W., Fiscal a exigi 5 aña di prison.
Abogadonan a presenta nan defensa y awor Hues ta bay studia e caso y dentro di algun siman lo tin sentencia.
FUENTE: Diario de Aruba
