Oficina di abogado mr. David Kock a dicidi di para e caso sumario cu a cuminsa di e grupo di 6 ilegalnan contra Hulanda. Esaki despues cu autoridad a laga e ilegalnan bay y Gobierno a tuma un decision riba e ilegalnan pa cu e asunto di asilo.Investigacion cu DIARIO a haci riba henter e asunto aki ta mustra cu tin un procedimento cu mester sigui asina cu un extranhero pidi pa asilo politico. E hecho ta cu na 1986, Gobierno di Aruba a dicidi di forma parti di e tratado cu Hulanda tin pa cu asilo mientras cu Curacao si no a haci esey.
Esey ta trece cun’e cu si un extranhero bay pidi asilo, tin henter un procedura cu mester sigui. Den e caso di e grupo di ilegalnan, nan tabata deteni pa ilegal y nan a pidi asilo. Nan a keda deteni y esey a haci cu mr. David Kock su oficina a dicidi di cuminsa un caso contra Hulanda riba e cuestion di asilo.
Ta asina cu segun e procedura, asina un persona pidi pa asilo e mester worde laga liber.
Diaranzon e decision a cay cu ta laga e ilegalnan liber y cu Gobierno a tuma decision riba nan.
CASO LAR CONTRA GOBIERNO:
DIARIO por a compronde cu Gobierno a haci un accion hopi strategico pa evita e caso contra Hulanda. Awor Gobierno a tuma e decision cu e ilegalnan ta worde laga liber pero cu nan ta obliga pa tur dia mester notifica unda nan ta.
Ta asina cu awor cu Gobierno a tuma e decision ey, e oficina di abogado mr. David Kock a dicidi di cuminsa un caso contra e decision di Gobierno. Esey ta bira un caso LAR.
E situacion actual ta cu mientras cu e peticion di asilo ta den tramite, e ilegalnan ta liber y tin cu notifica tur dia unda nan ta.
DIARIO por a compronde cu oficina di mr. David Kock ta trahando riba e protesta (bezwaarschrift) contra e decision pa asina cuminsa e procedura di e caso LAR. Esey ta nifica cu posiblemente otro siman lo por spera tratamento di e caso aki.
FUENTE: Diario de Aruba
