Diego de Cuba di Sindicato STA a duna di conoce cu nan ta atento na e situacion y e desaroyonan na Warda Nos Costa.El a indica cu a mira e trahadornan bin pa dilanti poco poco y tur e cosnan a keda cla. Nan a haya locual tabata tin mester manera uniform.
Ainda tin comunicacion constante cu Bureau di Minister pa wak kico mas falta pa cu e situacion aki, pero el a lamenta cu tin cierto personanan cu kier hunga Dios y esey ta completamente eroneo, a señala.
El a bisa cu esaki ta un di e shopsteward cu tabata tin di STA, pero STA a bisa cu asina no ta traha y esey a pone cu e persona aki a rabia y el a hiba un cantidad di hende cune pa un otro sindicato y purba di influencia otro delegadonan na IASA.
Segun de Cuba, STA no tin problema cu esey y tur hende ta liber pa scoge nan sindicato cu nan kier pa representa nan. “Ta increibel con un hende bao di influencia por a haci tanto cos akinan. Ya hasta el a bay asina leu di molestia su excelencia, e minister en cuestion”, a expresa.
No obstante STA ta sigui bringa pa nan miembronan den Warda Nos Costa y aworaki a haya informacion cu e cantidad di detenidonan cu tin cera eynan pa cu e cantidad di personal cu tin ta un peliger.
Por ehempel, a indica, imagina si tin 12 persona cera den un cel y tin 6 hende so na pia di trabao y e hendenan aki lanta contra bo, bo tin un problema serio.
Diego de Cuba a remarca cu e problema aki tabata esper’e for di varios aña caba y aworaki gobierno tin tur atencion ariba dje tambe pa yega na un solucion.
Pasobra Aruba como otro islanan den e region no ta scapa di e problematica aki cual ta e cantidad di ilegalnan cu ta drenta pa via di e situacion na Venezuela.
Pa loke ta e situacion di seguridad di e empleadonan di Warda Nos Costa, STA ta kere cu ta deber di gobierno di Aruba conhuntamente cu Management Team pa tin personal suficiente ora cu tin e celnan yen.
E seguridad ta na prome lugar, a remarca.
Dentro di poco STA lo tin un reunion cu Minister di Husticia pa atende cu e asunto aki di seguridad na pia di trabao.
FUENTE: Diario de Aruba
