“Gobierno Mike Eman a hunga cu candela legal ora el a hinca Aruba conscientemente den e trampa politico di elimina BBO, cu a pone e gobierno na poder. Ora a bay busca Citgo, Aruba tabata den zona di peliger cu un debe nacional di 3.8 Miljard Florin cu ya tabata nifica un interes di 500 Mil florin pa dia pa e pueblo di Aruba paga. Por considera e forma cu a firma e acuerdo cu Citgo como un salto mortal politico pa yega na un formula magico cu a faya. Ley no ta permiti loke Gobierno Eman a haci.”Na palabra, informantenan cu a guia DIARIO durante e investigacion special cu e matutino di Aruba a realisa pa asina informa Aruba a base di berdad, kico a pasa cu Citgo y pakico Aruba ta den un crisis economico y financiero a base di e debe nacional tambe.
Informantenan a confirma e posicion cu Gobierno Mike Eman a hinca su mes den un caya sin salida cu e maneho financiero cu nan a inventa pa Aruba ora partido AVP bou Mike Eman a presenta su mes pa eleccion na 2009.
“E formula tabata pa tuma e medida popular cu lo a mantene e gobierno pa hopi tempo na poder, dor di crea un debe cu pueblo mester a paga den termino. A baha BBO, a introduci cantidad di proyecto popular cu no tabata tin placa pa paga na e momento, y a crea e debe nacional pa paga tur loke a haci,” expertonan riba tereno financiero a mustra.
Na 2014, Aruba tabata paga 500 Mil Florin pa dia na interes riba e debe nacional cu gobierno Mike Eman a crea y nan mester a tuma medida y busca un solucion.
“Citgo no a wordo atrae a base di un planificacion den cual a tuma tempo pa haci contacto y investigacionnan cu mester haci. Cualkier mucha chikito por a splica cu tanto Citgo, PDVSA, como Nicolas Maduro tabata motibo suficiente pa ta alerta. Venezuela ya tabata den problema economico y financiero serio pero pio cu esaki, ya tabata tin investigacion criminal den Citgo,” a wordo indica.
Hopi bes Gobierno Eman a bisa cu a bay busca contacto cu Citgo. Nunca Aruba a haya sa exactamente pakico a dicidi di atrae Citgo cu tabata un problema riba tur tereno.
Awe Aruba ta e victima directo pasobra ta hopi placa a hinca tambe pa bay busca Citgo, traha e infrastructura pa Citgo, sabiendo cu Citgo por a fracasa cualkier momento pero cu e contracto tambe por a resulta desastroso pa Aruba.
Manera informantenan ta splica, no tabata tin cifra concreto cuanto Citgo tabata produci e momento na Merca y ta cuestionabel con por a traha proyeccion pa Aruba.
Manera tur instancia a adverti e acuerdo tabata tin riesgo, cu gobierno Mike Eman a bari for di mesa cu mentira grandi.
Informantenan a sigui bisa, cu ta contra Ley pa gobernantenan mara un pais na un acuerdo cu ta contra bienestar di e pais y a destrui economia di e pais.
“Tur rapport oficial ta indica cu pa motibo di e promesa di Citgo no tabata tin esfuerso pa atende economia den e situacion financiero malo cu Aruba tabata for di 2014. Por supone cu Gabinete Mike Eman a kere cu e por sconde tras di Citgo y gana eleccion na 2017 prome cu e bom rementa manera na 2014. Esaki no a sosode,” informantenan a indica.
Nan a pone enfasis riba e hecho cu gobierno Mike Eman no a permiti ni Parlamento haci e trabou cu ley ta exigi. Nan a crea ademas un ambiente politico y a sigui te awe mantene e postura di blackmail politico contra tur oponente cu adverti pa Citgo.
“Gobierno Mike Eman a asumi un responsabilidad directo pa e proyecto Citgo cu hunto cu e debe nacional a crea un caos social na Aruba cu ta den problema serio. Parlamento tin e deber di cuminsa un investigacion awor pa asina evita cu loke a pasa ta bira un ehemplo pa gobernacion. Gobierno Eman a actua contra principionan di bon gobernacion y hasta nan huramento cu ta exigi di nan pa no pone bienestar di Aruba ni di Arubianonan na riesgo,” a wordo mustra.
DIARIO, cu informa pueblo di Aruba riba tur riesgo cu e pais ta core, lo sigui informa Aruba.
FUENTE: Diario de Aruba
