Prome Minister mr. Evelyn Wever Croes, ta sigui informa comunidad tocante e situacion na Venezuela, aunke no tin mucho cambio.Den conferencia di prensa Diahuebs, e dignatario a reitera cu e situacion na Venezuela ta sigui hopi tenso, internamente e ta un situacion dificil, agrava pa e sancionnan poni door di Merca.
Esaki a haci cu Minister Presidente tabata den contacto cu e Consul Mericano cu ta esun cu ta hiba e mensahenan pa gobierno di Aruba, y tambe Minister Plenipotenciario di nos pais na Washington ta hiba e mensahe aki, pa nan tene cuenta cu e impacto di nan decisionnan riba e Islanan aki.
“Naturalmente, nos no por pretende aki na Aruba cu nos por cambia e pensamento di Presidente Trump pa cu Venezuela, pasobra esey ta algo cu ta bay mucho mas halto cu nos. Pero si nos spera di Merca cu nan por yuda nos na unda di otro manera nan por, pa nos fortifica nos turismo y nos economia. Yuda nos pa asina nos por ta resiliente y wanta tur e golpinan cu nos ta wantando pa motibo di e situacion dificil na Venezuela”, Minister Presidente a señala.
El a reitera tambe cu e situacion dificil na Venezuela ta haci hopi Venezolano bira desespera y ta busca tur manera pa sali. E mandatario a referi na e boto cu a drenta Aruba exitosamente, y un di dos unda a logra di gara e gran mayoria di persona y tur loke nan a bin cune.
“Sinembargo e ta algo cu ta preocupa mi pasobra mi sa cu tur e hendenan aki ta subi e boto aya na Venezuela pa bin Aruba, ta pasobra aki na Aruba tin un hende ta invita nan bin”, Minister Presidente a indica.
El a remarca cu aki na Aruba tin hende ta pidi nan pa bin y tin hende ta paga pa nan bin. Y no mester lubida cu lama cu tin entre Aruba y Venezuela ta sumamente peligroso. “Bo no kier tin riba bo consenshi morto di hendenan cu ta cruza lama pasobra bo a bisa cu akinan tin hopi miho biba”.
Prome Minister ta señala cu esaki ta algo cu nos tur como ciudadano di Aruba independiente si a nace na Aruba of no, mester tene na cuenta. El a bisa cu e tambe tin famia na Venezuela y e sa con e situacion ta “y mi no por bisa un hende subi un boto numa y bin, cu tur cos ta bay ta bon”.
E mandatario a reitera cu tin un riesgo enormemente grandi cu gobierno no kier pa ningun hende core. “Mi ta haci un apelacion fuerte na tur esnan cu ta haci e invitacionnan ey, pa no hacie. E capitan di e boto a wordo deteni, esnan envolvi ta wordo persigui cu e castigonan di mas halto cu tin, pasobra trece hende di e forma ey no ta algo legal, ni cu a paga pe”, Prome Minister a señala.
Esaki ta considera como trafico di hende unda dificilmente esun cu hacie por saca su curpa afo. Claramente e mandatario a splica esey.
Aruba ta keda confronta e retonan y gobierno tin mas atencion awo pa loke ta trata e seguridad di nos fronteranan. E ta costa mas placa pa pone mas ambtenaar haci esaki, pero gobierno mester hacie.
FUENTE: Con información de Diario de Aruba
